Reorganisacion di e posicion huridico di ARUMIL

E meta di e proceso aki ta pa yega na un concepto di ley nobo, y stop di uza e “dienstplicht verordening” como base, mirando cu esaki ta un ley hopi bieu. A traves di un landsverordening y landsbesluit nobo, por regla e posicion huridico di e personal di ARUMIL.
Pa logra esaki, mester di e experticio di entre otro Departamento di Recurso Humano y Directie Wetgeving en Juridische Zaken (DWJZ) pero tambe di algun departamento na Corsou y Hulanda.

Mientrastanto, Minister di Husticia y Asunto Social, Rocco Tjon, a reuni entre otro cu Marnix Alink director di Asunto Huridico di Ministerio di Defensa di Hulanda y Commandant der Zeemacht Walter Hansen kende ta e hefe maximo di Kustwacht, Arumil y Curmil.

Na 2022 y 2023 a traha algun concepto, a defini e vision y direccion strategico unda kier bay cu ARUMIL. A establece un "timeline" den cual a stipula cu pa november 2024, e version final di e conceptonan di ley lo ta cla pa DWJZ analisa y duna su conseho. E intencion ta pa na comienso di 2025, inicia cu e trayecto di ley y pa prome di januari 2026, introduci esaki.

Henter e proceso aki lo cambia e posicion huridico di e personal di ARUMIL, lo nombra nan como empleado publico, pa despues di nan trayecto como ARUMIL nan por sigui den e cadena hudicial. Anticipando e aprobacion di e ley na 2026, ta bay haci un analisis di cuanto ARUMILLER lo ta saliendo for di servicio na comienso di 2026, pa di awo caba por cuminsa cu e trayecto pa
prepara nan pa por drenta por ehempel Cuerpo Policial, KIA, CEA etc. Mientrastanto, Cuerpo Policial ta sondeando e funcionnan specifico den nan orgnisacion, na unda por aloca esnan cu mester sali for di servicio di ARUMIL.

Pa e traspaso aki ta exitoso, e personal di ARUMIL mester ricibi e preparacion relevante pa nan continua den e cadena hudicial, pa cual Hulanda a mustra di ta dispuesto pa yuda cu fondonan pa logra esaki.