Medidanan di precaucion durante temporada di calor
ORANJESTAD – Durante e ultimo dianan nos por a tuma nota di un calor inmenso, temperatura hopi halto y un solo fuerte.
Esaki ta debi na e temporada cu nos drentando aden cu ta ser referi na dje como temporada di horcan.
Durante e temporada aki cu ta core di juni pa november nos comunidad por spera dianan cu hopi calor y temperatura hopi halto cu por ta peligroso pa nos salud. Pa combati e fenomeno di naturalesa aki no ta posibel, pero si nos por tuma accion pa proteha nos mes y preveni consecuencianan pa motibo di e calor extenso.
Calor por ocasiona deshidratacion, zonnesteek, presion halto, dolor di cabes, cansancio, biramento di cabes y stoma, sacamento, cram di musculo y hasta ataca (stroke) cerca un persona cu ta den e temperatura cayente pa un tempo largo.
Departamento di Salud Publico ta conseha comunidad pa durante e dianan cu ta sigui:
- Evita e calor: Keda den cas durante e ora mas cayente di dia cu ta entre 11:00 di merdia pa 2:00 di atardi.
- Mantene bo mes hidrata: Bebe suficiente awa pa preveni deshidratacion.
- Come cuminda liviano: Scoge cuminda cu tin hopi awa manera fruta y berdura.
- Evita bebida cayente y bebidanan cu ta contene cafeina of hopi sucu durante e oranan mas calor;
- Cumpra paña liviano: Scoge paña, fresco y los na curpa pa evita un golpi di calor (heat stroke). Uza paña di color cla preferibel di catuna of linen.
- Uza proteccion di solo: Haci uzo di un sombre of pechi, bril di solo y uza sunblock cu un SPF halto.
- Mantene e cambernan fresco: Uza fan, airco, cera bo cortina of tene un bon ventilacion pa mantene e cambernan fresco.
- Haya cuido pa gruponan vulnerabel: Duna atencion extra na mucha, hende grandi y hende cu malesa cronico.
- Limita esfuerso fisico: Limita actividadnan fisico intensivo durante e oranan di mas calor.
- Cuminda saludabel: Come cuminda liviano y nutritivo pa tene bo curpa den bon condicion.
- Uza proteccion contra sangura: Uza repelente pa sangura pa preveni malesanan manera Dengue y Zika.
- Proteha baby, bisti menos paña den cas y mas awa pa bebe;
- Proteha hende di edad avansa.
Nos muchanan, enfermonan y nos hende grandinan ta esnan mas vulnerabel pa e calor aki. Ta hopi importante pa vigilanan constantemente y refresca nan curpa pa wanta e temperatura abou y hidrata nan cu suficiente likido.