DVG ta pidi comunidad pa tuma precaucion cu calor y indice di calor halto

ORANJESTAD – Directie Volksgezondheid Aruba (DVG) ta conseha comunidad pa tuma precaucion cu e condicionnan di calor. 

Segun Departamento Meteorologico Aruba, temperatura maximo por yega 34°C, mientras cu indice di calor por varia entre 35°C y 40°C durante y rond di e oranan di merdia.

Temperatura real y e calor cu nos curpa ta sinti no semper ta mescos. Temperatura real ta loke thermometer ta midi, mientras cu indice di calor ta indica con cayente e temperatura ta sinti pa nos curpa, teniendo cuenta cu humedad den aire.

Ora nos curpa ta cayente, nos curpa ta soda pa fria. Pero ta ora cu sodo ta evapora e curpa ta perde calor. Ora humedad ta halto, sodo tin mas dificultad pa evapora y e curpa no por fria su mes mas eficientemente. P'esey, por ehempel, 31°C por sinti manera 37°C of 38°C.

Indice di calor halto por aumenta riesgo di deshidratacion y agotamento pa calor, specialmente pa adulto mayor, baby y mucha chikito, hende muhe na estado, persona cu enfermedad cronico y hende cu ta traha of haci actividad fisico pafo.

DVG ta conseha comunidad pa bebe suficiente awa, evita exposicion prolonga na solo, busca sombra of un lugar fresco, bisti paña liviano y tuma pausa regularmente ora ta traha of haci actividad pafo.

Presta atencion na señalnan manera dolor di cabes, mareo, debilidad, nausea y sodamento excesivo. Confusion of perdida di conocemento ta señalnan serio cu ta rekeri atencion medico inmediato.

No wak solamente cuanto grado thermometer ta indica. Presta atencion tambe na indice di calor y proteha bo curpa contra calor.

Pa keda semper bon informa:

Temperatura halto