DVG cu control severo di higiena y certificado di salud
ORANJESTAD - Regularmente e seccion di Warenkeuring en Higiena (DWH) di Departamento di Salud Publico (DVG) ta haci control di higiena y certificado di salud riba supermercado y den sector di “food and beverage,”
Esaki pa garantisa alimento di calidad y proteha comunidad di malesanan contagioso pa medio di alimento.
Tur persona cu ta traha cu cuminda y bebida, segun ley, mester tin un certificado di salud valido na momento di DWH su personal pasa pa controla. Pa e sector di “food and beverage” e exigencia aki no ta nada nobo. Esnan cu no cumpli cu ley y permiti empleado(nan) atende cu cuminda pa consumido sin un certificado di salud valido lo por haya sancion y lo sera e establecimento te ora cu e empleado(nan) tin e certificado di salud valido. Si e control di DWH tuma lugar riba diabierna y constata cu e trahadonan no tin nan certificado di salud na ordo, e establecimento por pasa henter fin di siman cera.
Pa evita cu DWH mester cera negoshinan, DVG ta recorda tur supermercado y sector di “food and beverage” pa cumpli cu tur regla di higiena y cada empleado cu ta atende cu cuminda, tin nan certificado di salud na ordo.
No warda te ora DWH yega den bo establecimento pa controla pa core manda empleadonan bay saca nan certificado di salud, mirando cu esaki tin un duracion di aproximadamente 10 dia di trabou prome cu e keda cla.
Pa mas informacion like nos Facebook page Directie Volksgezondheid DVG Aruba.
Follow nos riba Instagram directie_volksgezondheid_aruba, subi www.dvg.aw, yama 5224200 of mail nos na servicio@dvg.aw.