DIMAS cu servicio di Helpdesk na MFA Noord pa trece servicio mas cerca di comunidad
ORANJESTAD - Departamento di Integracion, Maneho y Admision di Stranhero (DIMAS) ta informa cu, durante e periodo aki, e servicio di Helpdesk lo ta opera temporalmente for di MFA Noord exclusivamente pa personanan cu tin cita confirma previamente.
Pa garantisa continuidad di servicio y minimisa inconveniencia pa clientenan cu tin cita, DIMAS a activa un localidad temporal na MFA Noord, unda e servicio di Helpdesk lo ta disponibel exclusivamente pa personanan cu tin cita confirma previamente.
E traslado temporal aki ta ofrece un oportunidad importante pa DIMAS evalua y test un modelo di servicio mas cerca di comunidad.
Durante e periodo di prueba, DIMAS lo analisa e experencia di cliente, accesibilidad di e localidad y e posibilidadnan pa, den futuro, expande e presencia di servicio den diferente bario. E meta ta pa haci servicionan gubernamental mas accesibel, cerca y conveniente pa publico.
Entrante diahuebs 18 di juni, lo atende personanan cu tin cita pa servicio di Helpdesk na MFA Noord segun nan horario confirma. DIMAS ta haci un yamada pa solamente personanan cu tin cita presenta na e localidad temporal pa garantisa un proceso ordena y eficiente.
Mientrastanto, DIMAS ta sigui traha activamente pa mantene continuidad di servicio y evalua diferente iniciativa cu por contribui na modernisacion di servicionan na beneficio di e comunidad.
DIMAS ta gradici publico pa nan cooperacion y ta mira cu entusiasmo e oportunidad pa sigui desaroya servicio publico cu ta mas cerca di hende y di nan necesidadnan diario.
