Dia Mundial di Reuma

E dia aki tin como meta principal pa crea conscientisacion mundial y duna visibilidad na e impacto di enfermedadnan reumatico y musculo-sceletico (RMDs). 

Pa e aña aki, e tema oficial lansa pa e Aliansa Europeo di Asociacionnan di Reumatologia ta "Achieve Your Dreams" ("Logra bo Sueñonan"). E campaña aki ta enfoca riba e speransa, metanan personal di e pacientnan, cooperando hunto cu doctornan y investigadornan pa haci nan sueñonan posibel a pesar di e limitacionnan fisico.

Salud di nos articulacionnan ta hunga un rol fundamental den nos mobilidad y bienestar! 
Awe Departamento di Salud Publico (DVG) kier pone enfasis riba e importancia di reconoce e prome señalnan di inflamacion y perdida di mobilidad den e articulacionnan, pa por actua na tempo.

DVG ta comparti aki 3 tip pa cuida bo articulacionnan y yuda preveni of maneha reuma:

• Mantene un estilo di bida activo y haci ehercicio di poco impacto: Practica ehercicio suave y regular; manera landa, cana of yoga ta fortalece e musculonan rond di e articulacionnan sin pon’ e peso of presion innecesario riba nan.
• Tene un dieta balansa y anti-inflamatorio: Inclui cuminda rico den omega-3 (manera pisca), fruta, berdura y cereal integral, y reduci e consumo di cuminda procesa y sucu cu por fomenta inflamacion den curpa.
• Mantene un peso saludabel y no huma: Mantene un peso adecua ta reduci e presion constante riba articulacionnan di rudia, heup y pia. Ademas, evita huma, pasobra e ta un factor di riesgo conoci cu por empeora of trece cu ne condicionnan reumatico.

Corda cu cuida bo curpa awe ta preveni dolor mañan!