Dia Internacional di Idioma Materno 2026

E aña aki UNESCO ta enfoca riba e rol importante cu hende hoben ta hunga den esaki. Tur aña tin hopi idioma ta muri. Expertonan ta calcula cu di e 7 mil idiomanan na mundo, mas o menos 300 so a haya un luga den enseñansa y ta  uza menos di 100 den e mundo digital. Nos hobennan por hunga un rol activo den proteccion di idioma, crea contenido digital y uza tecnologia pa haci diversidad linguistico bira mas visibel y haya su balor. 

Multilingualismo 

Aruba ta un isla multilingual cu ta duna importancia na conocemento di idioma, specialmente pa loke ta trata e 4 idiomanan Papiamento, Hulandes, Ingles y Spaño. E cifranan di Censo di 2020 ta mustra tambe cu 1 di cada 3 habitante (35%) ta papia mas cu un idioma na cas. Papiamento ta esun mas papia, sigui pa Spaño, Ingles y Hulandes. E 4 idiomanan aki ta hunga un rol importante tambe den nos comunidad en general. Ta importante pa e multilingualismo di Aruba keda refleha tambe den enseñansa. Na 2023 minister a aproba e maneho integral di idioma den enseñansa, caminda tur 4 idioma ta hunga un rol importante. (https://www.ea.aw/pages/integraal-taalbeleid-onderwijs-2023-doc). Fuera di e 4 idiomanan menciona, ta importante pa mucha di otro habla tambe sinti nan mes acepta y balora na scol pa ken nan ta. 

Importancia di cuida y preserva idioma 

Na 2007 Asamblea General di Nacionnan Uni a pidi e paisnan miembro pa cuida y proteha tur idioma uza pa tur pueblo na mundo. Diversidad linguistico por ta un instrumento di paz duradero. Entre otro pa motibo di globalisacion, tin hopi idioma ta bayendo perdi. Un factor importante pa mantene idioma bibo ta pa traspasa esaki di generacion pa generacion. Si mucha stop di papia un idioma, esaki ta bay perdi. Un otro factor importante ta e presencia den e mundo digital. 

Papiamento 

Papiamento ta parti di herencia cultural di Aruba, idioma di cas di mayoria y idioma oficial. E ta un idioma vital den sentido cu e tin suficiente papiado cu ta transmiti e idioma di un generacion pa otro. Tambe tin desaroyonan positivo ta tumando luga riba tereno di enseñansa, literatura, digitalisacion y documentacion. Algun ehempel ta alfabetisacion na Papiamento, publicacion di buki literario di DEA, charlanan di Fundacion Lanta Papiamento y proyectonan di digitalisacion manera www.coleccion.aw (di BNA y ANA) y Wikipedia riba Aruba. Na mes momento ta hopi importante pa ta consciente di e importancia pa traha riba cuido y desaroyo di nos idioma. E aña aki UNESCO ta enfoca riba e rol di nos hobennan riba e parti aki. Papiamento ta den nos man pa cuid’e y proteh’e. 

Mas informacion 

Pa mas informacion relaciona cu Papiamento por acudi na e website www,papiamento.aw y sigui @Papiamento.aw riba Instagram y @PapiamentoAruba riba Facebook.