Departamento di Labor y Investigacion (DAO) ta presenta resultadonan exitoso di 'Tienda Legal Laboral' (TLL) durante su prome lunanan di servicio

ORANJESTAD  – Directie Arbeid en Onderzoek (DAO) hunto cu Ministerio di Turismo, Transporte y Labor, ta comparti cu gran satisfaccion e prome resultadonan di e departamento nobo ‘Tienda Legal Laboral’ (TLL). 

Desde apertura di e localidadnan piloto na MFA Savaneta y MFA Paradera na mei 2026, e servicio a demostra di ta un herment esencial, accesibel y exitoso pa comunidad di Aruba. E cifranan di e lunanan di mei y juni ta confirma cu e vision proactivo, enfoca riba prevencion y informacion preventivo, ta dunando bon resultado. 

Un empuhe fuerte desde e inicio 

E prome luna di operacion (mei 2026) a cuminsa y a registra un total di 109 dossier nobo. E ekipo a demostra un eficiencia halto door di logra rond af 66% (72 dossier) di e casonan aki cu exito. Pa loke ta trata e tipo di servicio, e personal tabatin 307 contacto via telefon, 135 via e-mail, brindando un ambiente neutral y di confiansa pa 103 cliente nobo y 38 cliente existente. Mayoria di e consultanan y keho den e periodo inicial aki tabata relata na fin di contracto di trabou (35 dossier), contenido di contractonan (19 dossier) y sueldo (13 dossier). 

Inauguracion Tienda Legal Laboral.

Crecemento continuo y impacto den bario durante juni 

Den luna di juni 2026, e impacto positivo a sigui crece significativamente, bisto den e total di 142 dossier nobo registra via e asistencianan na e dos localidadnan di TLL. E decision strategico di hiba e servicio mas cerca di e ciudadano a resulta den un exito rotundo. 

Den e mesun luna di juni, e resolucion di conflicto y orientacion a keda central: nos personal a logra conclui un total combina di 99 caso cu exito (44 na Savaneta y 55 na Paradera). Tur dos localidad a raporta cu e tema di "Fin di Contrato di Trabou" (Einde A.O.) a keda e topico principal di mas consulta. Esaki ta confirma e necesidad pa sigui informa trahado (cu tabata representa 95% di e clientela nobo na mei) y doño di trabou structuralmente y den un fase trempan tocante nan derecho- y debernan. 

Cumpliendo cu e 5 pilarnan 

E resultadonan positivo aki den un tempo hopi cortico ta contrarestando e manera bieu di traha caminda e enfoke tabata unicamente riba conflicto. Tienda Legal Laboral ta cumpliendo cu su 5 pilarnan: Husto, Profesional, Servicial, Uniforme y Accesibel. 

DAO ta invita e comunidad completo di Aruba, tanto trahado como dunado di trabou, pa sigui probecha di e forma nobo di servicio aki. Nos personal ta cla pa brinda e miho guia legal y mediacion laboral via nos sistema di ‘intake’ rapido y directo. 

Orario di Intake y Contacto

Pa mantene e drempel mas abou posibel, TLL lo funciona a base di ‘intake’. Lo purba atende e ciudadanonan mesora segun disponibilidad. Si esaki no ta posibel, nos ta yuda traha un cita pa un otro momento.

E siguiente orarionan di pa intake lo ta vigente na MFA Savaneta y MFA Paradera:

  • Dialuna - Diabierna: 08:00 – 12:00 & 13:00 – 15:00

  • Diaranson: 08:00 – 12:00

Localidad y Contacto

Nos ta invita comunidad pa bin conoce e forma nobo aki di servicio. Pa mas informacion, bo por bishita nos localidadnan of tuma contacto via e datonan aki bou:

Tienda Legal Laboral

Nos ta cla pa sigui brinda e miho sosten y conseho laboral, den bo bario.