Back to school: Tips di Salud pa mayor!

ORANJESTAD – Departamento di Salud Publico (DVG) kier duna algun tips pa mayor pa comiensa di scol despues di vakantie grandi. 

Un bon aña escolar ta cuminsa cu un mucha saludabel. Como mayor, tene cuenta cu e siguiente puntonan: 

  • Suficiente soño: Establece un rutina fiho di drumimento. Suficiente soño ta importante pa concentracion, memoria, estado di animo y energia durante dia.
  • Alimentacion saludabel: Percura pa bo yiu cuminsa su dia cu un bon desayuno y manda p'e un snack y lunch nutritivo pa scol.
  • Cada mucha cu su propio termo: Manda bo yiu scol cu suficiente awa den su propio termo. Siñ'e pa no comparti su termo, beker, ni forki, cuchara (cubierto) cu otro mucha.
  • Bon higiena:  Siña bo yiu laba man regularmente cu awa y habon, specialmente prome cu come y despues di bay baño. Record'e di tosa y nister den parti interno di elleboog.
  • Proteccion contra calor y solo: Stimula bo yiu pa bebe suficiente awa y tene cuenta cu proteccion contra solo, specialmente durante pauze y actividadnan pafo.
  • Vacunacion: Controla si vacunanan di bo yiu ta 'al dia'. Vacunacion ta yuda proteha bo yiu y comunidad escolar contra diferente malesa contagioso.
  • Bo yiu ta malo? Tene na cas: - Si bo yiu tin keintura, sacamento, diarea of no ta sinti bon, ten'e na cas p'e recupera y evita transmision di malesa na scol.
  • Cuido personal: Mantene huña cortico y limpi, stimula bon higiene oral y controla regularmente pa pieu.
  • Salud emocional tambe ta importante: Papia cu bo yiu tocante su dia, con e ta sinti y si tin algo na scol cu ta preocup'e. Paga atencion na cambionan den comportacion of estado di animo.

Un mucha bon alimenta, hidrata, descansa y cu bon higiena tin un miho base pa siña, crece y disfruta di su aña escolar.

Pa keda semper bon informa:

Back to school: Tips di Salud pa mayor!