Aruba y Corsou ta firma Memorandum of Understanding (MoU) pa digitalisacion di educacion y gobierno digital

E acuerdo aki, firma pa Sra. mr. Gerlien Croes, Minister di Relacionnan den Reino, Educacion, Hubentud, Innovacion y Deporte, hunto cu sr. Sithree van Heydoorn, Minister di Enseñansa, Ciencia, Cultura y Deporte di Corsou, ta marca un paso importante pa ambos pais den Reino.

Intercambio di experencia y avance tecnologico

E colaboracion ta basa riba e principionan di eficiencia, reciprocidad y transparencia. Corsou lo comparti su experencia y conocemento adkiri cu e Centraal Landelijke Onderwijs Applicatie (CLOA), un sistema digital cu ta inclui dashboards, plataformanan central di educacion pa maneho, monitoreo y evaluacion di informacion den veld di educacion. Di forma paralelo, Aruba lo comparti su avance den e trayectorianan di E-Government, interoperabilidad entre departamentonan di gobierno, y e creacion di un Shared Service Organisatie pa solidez di e sistemanan.

Pilar nan clave di e cooperacion

E acuerdo ta cubri varios area di trabou pa futuro cercano:

• Sistemanan di Informacion di Educacion: Desaroyo y intercambio di plataforma di dato, registracion di studiante, y dashboards centralisa pa apoyo di maneho.
• Roadmap di Digitalisacion: Apoyo pa elaboracion di un roadmap strategico riba digitalisacion den educacion pa Aruba.
• Interoperabilidad y Gobierno Digital: Conexion entre e registracionnan sectorial di educacion y registracionnan nacional basico di gobierno.
• Innovacion Pedagogico y STEM: Intercambio di conocemento riba curriculum, didactica digital, y e fortalecemento di habilidadnan digital y educacion di STEM (Ciencia, Tecnologia, Ingenieria y Matematica).
• Proyectonan Piloto: Exploracion di proyecto conhunto den examinacion digital, learning analytics, y modelonan di siñamento hibrido (blended learning).

Maneho y proximo pasonan

E MoU aki tin un duracion di tres aña y lo ta coordina pa medio di un punto di contacto central nacional, nombra pa ambos pais. Ademas, e acuerdo ta sirbi como un paso preliminario pa yega na un acuerdo mas formal pa medio di sesionnan di trabou intensivo.

Minister Gerlien Croes ta sumamente satisfecho cu e acuerdo aki, cual lo trece innovacion y diferente posibilidad den e veld di educacion. Ademas, e cooperacion aki ta fortifica e lasonan regional ariba diferente nivel. Cu e paso aki, gobierno ta reitera su compromiso cu un educacion innovativo, modernisa y prepara pa e futuro y retonan di e era digital.