Aruba experenciando temporada di calor excesivo
ORANJESTAD - Aruba ta experenciando un periodo di calor excesivo cu temperatura di entre 34-36°C durante dia y un indice di calor di 44°C cu ta indica e nivel di calor percibi pa hende (‘feels like’).
Nivel halto di humedad, combina cu alivio minimo durante anochi por conduci na incomodidad y hasta riesgo pa salud. E temporada aki lo continua durante augustus, september y october.
E situacion di temperatura extremo ta empeora door di cambio climatico cu ta hisa e frecuencia y intensidad di olanan di calor mundialmente.
Pa siguridad durante e periodo aki ta esencial pa tuma algun precaucion:
- Keda hidrata: Bebe suficiente awa y evita bebida cu hopi sucu.
- Limita actividad pafo: Limita actividad fisico pa oranan di mainta of anochi ora ta mas fresco.
- Busca sombra of ta paden: Keda den ambiente cu airco ora ta posibel.
- Bisti adecuadamente: Paña los cu colornan cla ta yuda mantene bo curpa fresco.
- Uza protector solar (sunblock): Proteha bo cuero di rayonan ultravioleta(UV) intenso door di hunta protector solar regularmente.
E medidanan aki no solamente ta crucial pa comodidad pero tambe ta yuda preveni problemanan di salud ocasiona pa calor cu lo por hasta pone bo bida na peliger. Esaki ta conta specialmente pa mucha chikito, adulto mayor y esnan cu problema di curason.