Yamada na tur agricultor pa participa den un encuesta tocante di e necesidadnan relata cu e uzo di coriente den sector primario

E encuesta aki ta forma parti di un iniciativa mas amplio di gobierno pa desaroya un tarifa special di electricidad pa tur esnan activo den sector primario y pa kita e burocracia (red tape) cu ta existi pa conexion di corriente of pa amplia e capacidad.

“E sector primario ta sumamente importante pa nos como pais por sigura e siguridad alimenticio y ta forma parti pa haci Aruba un pais mas sostenibel y resiliente. Cu e encuesta aki nos kier sigura cu nos productornan local por sigui expande door di ofrece nan tarifanan mas rasonabel” Minister Geoffrey Wever a cuminsa ta bisa.

Den colaboracion cu Departamento di Agricultura, Cria y Pesca/Santa Rosa, Elmar y WEB, e ministerio di Finansa, Asunto Economico y Sector Primario kier inventarisa kico ta e necesidadnan y obstaculonan mas grandi, pa asina hunto. den corto plaso por yega na solucionnan concreto. 

Tur esnan cu ta activo den sector primario ta invita pa participa den e encuesta aki door di yena e formulario online via https://bit.ly/encuestasectorprimario 

Tambe por pasa na Santa Rosa y yena e formulario den persona y asina contribui activamente na e tarifa di coriente nobo pa sector primario.

E ultimo dia pa participa na e encuesta ta 21 di october proximo. 

Pa mas informacion por tuma contacto cu Santa Rosa via e-mail: info@santarosa.aw.