Yamada di Accion pa doñonan di propiedad den Oranjestad y San Nicolas cu ta buscando inversion
ORANJESTAD - Dialuna 4 di maart 2024, Minister di Asunto Economico, Comunicacion y Desaroyo Sostenibrl, Geoffrey Wever a haci un yamada na tur comerciante y of doño di edificionan den centro di ciudad na Oranjestad y San Nicolas pa haci uzo di e oportunidad y participa na e "showcase event" durante di Aruba Investment Summit na Hulanda 21 di maart proximo.
Un tempo, centro di Oranjestad y San Nicolas, tabata florece cu actividad comercial, pero e modelo economico cu un tempo tabata sostene San Nicolas y Oranjestad ya no ta relevante y ta rekeri un revision fundamental. Mester transforma e areanan den nos centro di ciudad den espacionan vibrante, multifuncional cu potencial pa vivienda, gastronomia, entretenimento, y otro facilidadnan publico. Pa logra esaki, inversion ta crucial, pa cual e Aruba Investment Summit 2024 na Den Haag ta presenta un momento oportuno pa atrae e financiamiento necesario pa reactiva actividad comercial den e centronan urbano.
Colabora na e Revitalisacion di nos centronan di ciudad
Si bo ta buscando pa bende of lease bo propiedad, of ta buscando inversionista como co-borrower / partnership, y bo ta desea di registra of ricibi mas informacion? Por manda un email na: info@investinaruba.com
Door di registra bo propiedad cu ta ubica den centro di San Nicolas y Oranjestad, abo como propietario ta haya acceso pa medio di e summit aki pa expone bo propiedad na mercado mucho mas grandi di potencial inversionistanan Europeo.
Propiedadnan den e centronan di ciudad di San Nicolas y Oranjestad, sea terenonan bashi, edificionan bandona, of espacionan sub-utilisa, ta crea potencial pa explora, pa cual informacion di e propiedadnan aki ta importante: nan disponibilidad, condicion, y e interes di nan doñonan pa bende, lease, renoba, of colabora pa establece negoshinan unico den e edificionan aki.
Ta profila Aruba como e destinacion turistico y awo mester showcase Aruba na Hulanda como e pais pa haci inversion tambe. E iniciativa aki no ta solamente pa identifica propiedadnan disponibel, pero tambe ta fomenta un dialogo entre doñonan di propiedad y potencial inversionistanan, creando partnership cu lo sirbi como e fundeshi pa revitalisacion di nos centronan di ciudad.