Voogdijraad a celebra 120 aniversario y a presenta logo nobo
ORANJESTAD - Diabierna 25 di september, Directie Voogdijraad, hunto cu partnernan den cadena social y huridico a celebra e di 120 aniversario di Directie Voogdijraad.
Durante e celebracion aki, ademas a revela oficialmente e logo y identidad visual nobo di Voogdijraad, a introduci un diseño interior recien renoba y un Kinderkamer specialmente crea pa ofrece menornan un ambiente mas trankil.
Voogdijraad ta cumpli un rol importante y delicado den comunidad, particularmente den proteccion di menornan y personanan vulnerabel. Durante un mensahe di video, Minister di Husticia Arthur Dowers a expresa su gratitud pa e trabao cu Voogdijraad a desplega durante añanan largo na servicio di comunidad Arubano.
Minister Dowers a enfatisa cu proteccion di menornan no semper ta un tarea facil. Den diferente situacion den cual Voogdijraad mester interveni den relacionnan familiar y tuma decisionnan cu por ta dificil pa e personanan involucra. Sinembargo, Gobierno tin e obligacion di garantisa cu ora algo no ta bayendo bon, specialmente ora bienestar di un menor ta na riesgo, e institucionnan responsabel ta actua pa proteha esnan mas vulnerabel.
E celebracion di 120 aña a marca tambe un paso nobo den identidad di Voogdijraad cu presentacion di su logo y imagen visual nobo. E rebranding ta simbolisa un organisacion cu ta honra su historia, mientras cu ta sigui modernisa y fortalece su servicio na comunidad.
Un otro desaroyo importante ta e recien renoba Kinderkamer. E espacio special aki ta destina pa menornan cu ta bishita Voogdijraad y ta crea un ambiente mas adapta na nan necesidadnan, cu mas trankilidad y siguridad durante un momento cu por ta dificil of emocional.
Proteccion di nos menornan ta un responsabilidad comparti. Gobierno, instancianan di husticia, partnernan den cadena y comunidad tin cada uno un rol den e proceso aki. Dentro di esaki, Voogdijraad ta un instrumento importante pa garantisa cu e interes y bienestar di e menor ta protegi.
Despues di 120 aña, Voogdijraad ta sigui evoluciona, profesionalisa y adapta su servicio, cu un meta cu ta keda central: proteha nos menornan cual ta esnan mas vulnerabel den nos comunidad.