Vacunacion contra influenza disponibel den bario

ORANJESTAD - Directie Volksgezondheid (DVG) ta informa cu manera tur aña den colaboracion cu Crisis Management Office (CMO) e bus lo bay ta den diferente bario pa brinda e vacuna contra influenza y facilitando asina e acceso pa busca e vacuna especialmente na personanan cu ta pertenece na un grupo di risico.

E bus di vacunacion lo ta presente di 8:30 pa 11:30 di mainta na e siguiente fechanan y localidadnan:

  • Diamars 20 di october 2026: IMSAN
  • Diaranson 21 di october 2026: Centro di Bario Playa Pabao
  • Diahuebs 22 di october 2026: Centro Deportivo Santa Cruz
  • Diabierna 23 di october 2026: Stadion Frans Figaroa

Pa ken vacunacion contra influenza ta recomenda?

Vacunacion contra influenza ta especialmente importante pa personanan cu tin mas risico di haya complicacion serio si nan haya influenza. Esaki ta inclui:

  • Personanan di 60 aña of mas;
  • Adultonan entre 18 y 59 aña cu ta pertenece na un grupo di risico medico;
  • Adultonan y muchanan cu un risico medico halto, por ehempel personanan cu un trastorno serio di defensa;
  • Personanan cu, debi na nan condicion medico of tratamento, a haya indicacion di nan dokter di cas, specialista of pediatra pa vacuna;
  • Hende mujer na estado cu ta cumpli cu e criterianan medico pa vacunacion;
  • Trahadornan den cuido cu tin contacto directo cu paciente, especialmente paciente vulnerabel;
  • Ciudadanonan cu ta inmobil na cama y cu no por acudi personalmente pa vacunacion.

Ciudadano inmobil na cama

Ciudadanonan cu ta inmobil na cama y cu debi na nan condicion, no por acudi na un localidad di vacunacion, por yama DVG na 522-4200 pa haci un cita pa vacunacion.

Ken por haya e vacuna gratis?

Personanan di 60 aña of mas por haya e vacuna gratis y mester trece nan carchi di AZV.
Personanan bou di 60 aña cu ta pertenece na un grupo di risico medico mester trece nan carchi di AZV y un recept di dokter pa haya e vacuna 

Bo kier cumpra e vacuna?

Personanan cu no ta bin na remarca pa vacunacion gratis, pero cu desea di vacuna contra influenza, por cumpra e vacuna pa Afl. 20,- na Seccion di Malesanan Infeccioso di DVG, entre 1:30 pa 3:30 di atardi. No por cumpra vacuna na e bus den bario. 

DVG ta invita tur persona cu ta pertenece na un grupo di risico pa haci uso di e oportunidad y pasa vacuna na e localidad mas cerca di nan.

Influenza ta mas cu un simpel griep. E por causa complicacion serio, specialmente cerca personanan vulnerabel. Vacunacion ta yuda reduci e risico di enfermedad grave y complicacion.

Pa keda semper informa:

Vacunacion contra influenza den bario.