Uzo di plach’I number falso ta castigabel!

𝗞𝗶𝗰𝗼 𝘁𝗮 𝗽𝗹𝗮𝗰𝗵𝗶 𝗳𝗮𝗹𝘀𝗼?

• Plachi falso ta tur plachi di number blauw cu blanco cu NO a wordo otorga door di Departamento di Impuesto.
• Plachi falso ta tur plachi di number di añanan bieu, esta plachinan di prome cu aña 2020 por ehempel plachinan oranje cu blanco
• Plachi falso ta tur plachi traha di papel, carton, sticker, plastic, metal of cualkier otro material.

Plachinan falso NO ta legal y NO ta permitibel riba nos careteranan publico. 

𝗣𝗹𝗮𝗰𝗵𝗶𝗻𝗮𝗻 𝗱𝗶 𝗮𝗻̃𝗮 𝟮𝟬𝟮𝟬
E plachinan cora cu blanco di aña 2020 ta permitibel ainda. Dentro di poco Departamento di Impuesto conhuntamente cu Polis lo anuncia te ki dia por core cu e plachinan aki. 

𝗠𝗲𝗹𝗱 𝗲 𝗰𝗮𝘀𝗼
Si Bo wak un auto, brommer, truck etc. ta core cu plach'i number falso, please notifica nos di esaki via nos formulario digital di fraude:

https://www.impuesto.aw/fraude

Ora di notifica e caso, no ta rekeri pa Bo duna bo nomber. Por haci esaki den forma anonimo. Si ta consehabel, pa duna mas detaye cu ta posibel. Por ehempel fecha y lugar unda a wak e auto, tipo y color di auto etc. Mas hopi detaye Bo duna nos, mas miho nos por investiga e caso. Alabes por upload un of mas potret di e auto pa nos por tin un bon bista di e vehiculo. 

𝗙𝗜𝗢𝗧 𝘁𝗮 𝗶𝗻𝘃𝗲𝘀𝘁𝗶𝗴𝗮
FIOT, nos departamento di inteligencia fiscal, ta encarga pa investiga casonan di plachi falso. E casonan aki ta wordo considera como fraude fiscal y eventualmente hunto cu otro instancianan hudicial, lo por persigui esnan cu a comete e actonan aki. Alabes, nan lo investiga e personanan y/of empresanan cu ta traha of print plachinan falso pa nan clientenan.
(FIOT: Fiscale inlichtingen- en opsporingsteam)

𝗖𝗼𝗺𝗽𝗼𝗿𝘁𝗮𝗰𝗶𝗼𝗻 𝗰𝗼𝗿𝗲𝗰𝘁𝗼 𝘆 𝗵𝗼𝗻𝗲𝘀𝘁𝗼
Departamento di Impuesto kier reitera cu nos contribuyentenan mester tin un comportacion corecto y honesto pa cu nan debernan di impuesto. No ta corecto pa esnan cu no ta paga nan impuesto di vehiculo di motor, ta trafica cu plachi falso riba nos careteranan publico y di otro banda e no ta husto pa esnan cu si ta paga nan impuesto debidamente tin cu topa cu e mal comportacion aki cu na final di dia ta perhudica nos Pais! 

P'esey, notifica! Paso mal comportacion no por wordo hustifica!