UNESCO Biosphere Reserve ta confirma cu tera y lama di Aruba ta un solo sistema integra”

Segun Oduber, e reconocemento internacional ta confirma oficialmente Aruba su entrada den e red mundial di UNESCO Biosphere Reserves, cu ta conta den 2025 cu 784 reserva den 142 pais.

“Esaki ta un momento historico pa Aruba y pa region di Caribe,” Oduber a expresa. “Aruba lo bira e di tres reserva di biosfera den Caribe Hulandes y Ingles, fortaleciendo e presencia di nos region den e red mundial aki.”

Oduber a splica cu un Biosphere Reserve ta mucho mas cu un reconocemento simbolico. E designacion ta representa un compromiso a largo plaso pa traha rumbo na un futuro unda naturalesa, cultura, ciencia, economia y comunidad por florece hunto.

E reserva di biosfera di Aruba lo cubri Aruba completo, incluyendo mas cu 19.000 hectarea di tera y aproximadamente 3 miyon hectarea den zona maritimo y economico alrededor di Aruba. E designacion ta reconoce cu tera y lama no por ta maneha separadamente, pero como un solo sistema conecta cu ta sostene bienestar, economia y identidad cultural di Aruba.

“Pa Aruba, como un Large Ocean State, un lama saludabel ta esencial pa nos siguridad alimentario, economia blauw, turismo y resiliencia contra cambio climatico,” Oduber a splica.

Segun e experto, e matanan di mangel, yerba di lama y rifnan di coral no solamente ta sostene biodiversidad, pero tambe ta proteha comunidadnan costero y forma di bida di Aruba.

Oduber a conecta e vision aki directamente cu diferente iniciativa ambiental cu actualmente ta den marcha na Aruba, incluyendo proyecto di reforestacion, restauracion di coral y fortalecemento di Aruba Marine Park.

Tambe a menciona cu e vision di Biosphere Reserve ta alinea cu diferente cooperacion regional y internacional, incluyendo Ocean Coordination Mechanism, programanan di IOC/UNESCO y diferente aliansa crea durante e Common Good Conference, unda a firma MoU enfoca riba sostenibilidad, restauracion ambiental y cooperacion cientifico.

Segun Oduber, un di e aspectonan mas importante di e reconocemento ta cu Aruba a logra esaki door di un amplio proceso di co-creacion y dialogo social. Gobierno, NGO’s, comunidad cientifico, sector priva, sector turistico, piscadonan, institucionnan educativo y hobennan tur a contribui den forma e vision comparti aki.

“E reserva di biosfera ta pertenece na nos tur,” Oduber a enfatisa. “Cada stakeholder tin un rol importante den proteccion, maneho sostenibel y regeneracion di nos recursonan natural.”

Segun Oduber, Aruba awo tin oportunidad pa bira un “living laboratory” y centro regional di estudio y innovacion den area di desaroyo sostenibel, compartiendo experiencia y siñando hunto cu otro reserva di biosfera den Caribe y den resto di mundo.

Na final di su declaracion, Oduber a enfatisa cu e exito di e Biosphere Reserve no ta depende solamente di e reconocemento di UNESCO, pero di e compromiso colectivo di comunidad Arubiano.

“Su exito lo depende di nos compromiso comparti, nos dialogo social continuo y nos disponibilidad pa sigui traha hunto pa un Aruba mas resiliente, prospero y sostenibel,” el a conclui.