Un obra di Mosaico unico cu un diseño special
ORANJESTAD - Artista di mosaico, Sra. Enrita Werleman, hunto cu su studiantenan ta forma ‘Atelier Mosaic’, cu ta un atelier di mosaico na Sta Cruz 111.
Riba invitacion di directora di biblioteca, Sra. Astrid Britten, Atemosa a cuminsa riba un Obra di Mosaico impresionante. Hunto, empleadonan di biblioteca y studiantenan di Enrita Werleman a decora un mesa y dos banki di beton cu mosaico. Esaki pa un ‘zitje’ special bou palo di Watapana na e edificio principal na Playa. Artesanonan cu a pone man na obra ta: Donna Oduber, Livia Solognier, Dolores Machado, Dulce Goedgedrag, Deta Denters, Mariela Geerman, Bernadette Schouten y Grace Irausquin, Glenda Croes y ilustrador Ria Arrindell-Broeks. Empleadonan di biblioteca a yuda tambe den trahamento di e obra special aki. Pues un proyecto comunitario pa tur bishitante di biblioteca. Un danki grandi na tur!
Artista sra. Enrita Werleman, un autodidacto Arubiano, a cuminsa traha arte di mosaic como 15 aña pasa. Creando su mes arte di mosaic ela cuminsa educa tambe otronan con pa traha cu materialnan y hermentnan. Den transcurso di tempo Enrita a sigui desaroya su tecnicanan cu diferente material, manera mosaic, glas, piedranan, marmer y ceramica. Tambe ela tuma cursonan online y a gradua como maestra di Arte di Mosaic. Den un curso di dos aña cu un profesora di Chile ela amplia su conocemento riba tur tereno di arte di mosaic, di mosaico Antiguo te cu arte di mosaico contemporaneo. Enrita a siña traha cu tur sorto di material, herment, pego etc. Ta durante e cursonan aki cu ela crece tambe den e arte di Mosaic Picasiette y ela tuma cursonan na Alemania y Chili y a duna varios cursonan aki na a Aruba.
Diseño di e obra aki ta di Sra. Ria Arrindell-Broeks, ilustrador di buki pa mucha. Sra. Ria a diseña mas obra di mosaico y tambe Mosaik Picasiette, esaki ta un tecnica di traha cu pida mosaico di skoter, tayo y kopi. Ria ta ex-docente, full ocupa den su carera artistico.