Un exhibicion di poema
ORANJESTAD - E aña aki, Biblioteca Nacional Aruba ta celebra nan 75 aniversario, pa cual Bibliotecta na Oranjestad ta presenta un seleccion di poema na Papiamento riba su bentananan.
Cinco aña pasa, a cuminsa cu e exhibicion di un seleccion di poeta clasico. Mientrastanto a amplia e exposicion cu un seleccion di poema di poetanan contemporaneo y poema pa mucha.
E presentacion di poemanan ta di poetanan local: Belen Kock-Marchena, Denis Henriquez, Frenky Geerman, Frida Winklaar Domacasse, Gina Henriquez, Joe J. L. Fortin, Lily Clarisa, Luciano Milliard, Olga Buckley, Pancho Geerman, Reginald de Palm, Rosabelle Illes y Yakari Gabriel. E cinco poema pa mucha ta obra di Robert Reeberg, Desiree Correa, Mili Arends, Mercedes Petrochi y Liliana Erasmus.
Cinco aña pasa a cuminsa cu 11 obra di poetanan clasico, strofanan di poema di Hubert Booi, Ernesto Rosenstand, Federico Oduber, Nydia Ecury, Mario Dijkhoff, Nena Bennett y Nicolas Piña Lampe. Strofanan di cantica di Padu Lampe, Hildward Croes, Ramon Krozendijk y Bernadina Growell-Kock.
Biblioteca ta presenta e poemanan riba bentana y porta pa capta atencion di e publico y duna atencion y honor na nos poetanan local. Nan ta poemanan y fragmentonan impactante pa bishitante por lesa, conoce y disfruta di dje. Asina, hopi mas bishitante ta haya un impresion di expresionnan literario di yiunan di tera y kisas ta keda inspira pa lesa e obranan completo.
Tur publicacion di poesia ta forma parti di e coleccion di Biblioteca Nacional Aruba. Den cuadro di e celebracion di Biblioteca su 75 aniversario dunando un variedad di servicio na comunidad, aña pasa a renoba e edificio y actualmente mural artist Robby Solognier ta terminando un obra spectacular riba e murayanan di Biblioteca na Oranjestad.
Link: https://www.bibliotecanacional.aw/pages/homenahe-na-autor-y-compositor/
