Ultimo baki den bario pa 2025 lo ta na Barcadera riba 13 di december
ORANJESTAD – E ultimo evento di Baki den Bario ta tuma luga riba 13 di december 2025 na Barcadera.
E intencion di Baki permanente den areanan strategico lo ta e meta pa 2026. Ta mirando e posibilidad di seis luga pa aloca e bakinan aki, algo structura, accesibel y coordina, pa asina e comunidad por tin caminda pa deshaci di nan desperdicio 24/7.
Pa locual ta trata e accion di Baki den Bario di e fin di siman aki, lo bira e tereno net pabou di Arugas, na Barcadera. Tin un espacio amplio caminda lo tin e bakinan disponibel pa asina e pueblo por bin deshaci di nan sushi.
E ta un yamado na henter e comunidad, muy particular e area di Simeon Antonio, Cas Paloma, Mahuma, Wayaca, Santa Marta pa 2025 probecha e momento y temporada pa deshaci di desperdicio y haci e cas, e bario, scolnan, clubnan, compania limpi y bin tira tur sushi aki na Barcadera durante e accion di Baki den Bario.
Invitacion ta pa cuminsa prepara tur locual cu por durante siman y diasabra awo trece e desperdicio na e area asigna pa asina uni na e esfuerso grandi tumando luga pa un Aruba limpi y dushi pa biba riba dje. For di 7:00 AM te cu 11:30 AM lo tin diferente departamento presente pa asina coordina e entrega y facilita e fluho di auto pa tur cos cana lihe y organisa.
