Tres pilar den sector di cuido
ORANJESTAD – Den cuadro di e mehoracion di calidad di cuido y servicio, Ministerio di Salud Publico a comparti e vision cu ta parti den 3 pilar: mehoracion, inversion y prevencion.
Pilar 1 Mehoracion
Pa mehora calidad di cuido y servicio, e sector di cuido completo a firma e acuerdo di cuido (Zorgakkord) cu ta defini e rumbo cu mester hiba cuido medico den futuro. Esaki ta pa salvaguardia e fondo di AZV y garantisa seguro medico general na tur e asegurado. Den e acuerdo di cuido a enfoca riba e prioridadnan manera; reinforsa prome liña di cuido, aumenta e accesibilidad, baha e lista di espera y percura pa yena e vacaturanan di specialista.
Pilar 2 Inversion
E presupuesto financiero ta un parti esencial di e acuerdo di cuido. A aloca fondo pa por haci inversion den entre otro IMSAN su Centro di Radioterapia, Respaldo, Stichting Bob, Hospital, ambulance nobo y inversion den innovacion.
Pilar 3 Prevencion
Mirando e importancia di prevencion den cuido, a crea un Plan Nacional di Prevencion conhuntamente cu Pan American Health Organization (PAHO) y stakeholders den cuido medico. E meta di e plan di prevencion ta pa conscientisa y educa comunidad pa tin un estilo di bida mas saludabel, un miho calidad di bida y ta mas productivo den bida diario. Healthy Lifestyle Center ta fungi como un centro pa yuda guia y duna coaching na tur cu kier cambia nan estilo di bida pa uno mas saludabel.
Cuido medico di calidad ta un derecho fundamental, pero ta un responsabilidad colectivo di comunidad.
