Trabounan di saneamento di Dump di Parkietenbos lo inicia e aña aki

E investigacion ta indica cu tin tres punto di prioridad cu ta rekeri atencion inmediato y structural:

• E prome punto di preocupacion ta e inclinacion na parti zuid di dump cu ta pega na lama y cu ta demasiado halto. Como consecuencia di esaki, desperdicio ta bay den lama, creando un riesgo ambiental serio y un situacion cu no por sigui ignora. E situacion aki ta rekeri intervencion tecnico urgente pa preveni mas daño y pa proteha e ecosistema den e area.
• E di dos punto ta e fenomeno di asina yama “smouldering waste”, caminda desperdicio, aunke no tin candela visibel, ta kima bou tera durante tempo largo. Actualmente tin 16 area identifica unda esaki ta tuma luga. Ocasionalmente e sushi riba tera ta pega candela, causando molester grandi na e habitantenan di e bario. E problema aki no solamente ta crea molester pa e habitantenan, sino ta representa un riesgo pa salud publico y siguridad.
• E di tres punto di preocupacion ta e deposito di asbest riba e tereno. E material aki ta rekeri un maneho specialisa y costoso pa garantisa cu ta keda seya y controla sin forma riesgo pa medio ambiente ni pa salud publico. Mester di un plan serio y tecnico pa maneha e situacion di manera adecua y responsabel.

Pa Minister di Husticia, Integracion, Transporte Publico y Energia, mr. drs. Arthur Dowers, ta inaceptabel pa ignora e situacion di Parkietenbos, cu ta exigi accion structural, duradero y responsabel di  Gobierno. 

Den vision pa e futuro di e area, gobierno ta contempla un transformacion completo di e dump den un area cu mata nativo. E plan ta enfoca riba saneamento di e tereno, rehabilitacion ambiental y mehora e estetica di e area. Un area natural lo no solamente elimina e molester cu a afecta e bario durante hopi aña, pero tambe lo crea un espacio berde cu por contribui na bienestar general.