Trabou di renobacion a cuminsa na Mabon

Prome Minister Mike Eman, hunto cu director di FCCA Julie Wever y representantenan di e contratistanan, a asisti na inicio di e trabounan.

E renobacion ta encera verfmento di henter e edificio, construccion y reenforsa e structura di beton entre e edificionan, sigura cu e structura ta cumpli cu e tur norma di siguridad y calidad, como tambe cambio di entre otro e porta- y bentananan di cada vivienda.

Ademas Prome Minister Eman a informa cu diferente bario pronto lo mira renobacion y embeyecemento den nan bario, manera Bushiri y De Vuyst.   

Directora di FCCA Julie Wever tambe a expresa nan compromiso. E renobacion aki ta un ehempel di con nos ta traha hunto cu gobierno pa renoba barionan y fortifica comunidadnan. Door di bishita cada bario regularmente, nos ta trece residentenan hunto na un manera mas holistico y ta construi comunidadnan saludabel y sostenibel. 

E plannan di renobacion di bario ta poni den un Memorandum of Understanding (MoU), den cual FCCA y gobierno a haci palabracion riba colaboracion mas estrecho y mantencion regular. Mantencion pa futuro tambe ta algo cu a trece dilanti den combersacion cu gobierno, pa e no keda na un mantencion incidental so, pero bira algo mas structural. Esaki ta un responsabilidad comparti y cu acuerdonan bon defini lo por logra hopi mas.                               

Aruba tin un total di 45 bario di FCCA, cada un nan propio retonan. Gobierno tin e compromiso pa mehora e calidad di bida di cada ciudadano cu un acercamento cu ta bay mas leu cu djis vivienda, enfoca riba construccion di comunidad, habitabilidad y perspectiva pa futuro.