Trabao di restoracion di Cas Veneranda den centro di Oranjestad a cuminsa
ORANJESTAD - Cas Veneranda ta un di e edificionan mas iconico di Aruba y ta situa dilanti di Stadshuis na Oranjestad pero cu pa varios aña ta bandona y decai.
Ministerio di Asunto Economico su vision ta pa crea e sinergia necesario pa aumenta cantidad di persona cu ta frecuenta den centro di ciudad, y cu esaki, e restauracion di Cas Veneranda tabata un di e puntonan di enfoke.
Ministerio di Economia a pone fondo for di su propio presupuesto disponibel pa inverti den e
proyecto aki, cu e meta pa reubica e Departamento di Asunto Economico pa Cas Veneranda. E
renovacion ta refleha e dedicacion di e Ministerio di Economia, Comunicacion y Desaroyo
Sostenibel pa inverti den centro di Oranjestad.
Renobacion di Cas Veneranda lo brinda no solamente espacio nobo pa oficina pero tambe lo ta
ekipa cu panelnan solar pa reduci e gastonan mensual di coriente, aire condiciona eficiente y
insulacion. Tur esaki necesario pa transforma e edificio den uno mas sostenibel posibel y cu tambe ta respeta nos medio ambiente (environmentally friendly).
Adicionalmente, lo tin un espacio pa huur pa un restaurant, y tambe lo tin area pa reunion y conferencia. Durante ultimo lunanan, a haci trabaonan di preparacion anticipando e restauracion, poniendo gran enfasis riba conservacion di e integridad structural y e balor historico di e edificio.
E reubicacion di e departamentonan di Gobierno pa e centro di Oranjestad ta un di e strategianan pa yuda atrae mas movecion durante oranan di oficina, y di e manera aki beneficia e establecimentonan comercial den e bisindario tambe.