Town Hall Meeting cu ATIA tocante Rijkswet HOFA y Landsverordening WHO

Durante e serie di Town Hall Meetings lo reuni cu varios gremio y organisacionnan di comunidad. 

Como parti di esaki, riba 25 di mei a reuni cu ATIA. ATIA ta un gremio comercial importante, cu miembronan di sector priva cu tin un rol hopi importante den comunidad di Aruba. Desde 1945, ATIA ta representa comercio y tin alrededor di 150 miembro di cual ta representa mas cu 5.500 empleado. E bos di ATIA tin balor ambos pa e empresario y empleo actual y pa e futuro di Aruba. 

E meta di e Town Hall Meetings ta pa brinda informacion corecto y amplio tocante ambos ley, crea espacio pa pregunta y dialogo, y yuda comunidad forma un opinion basa riba informacion completo y corecto.

Durante e presentacion, Minister Wever a indica cu Aruba awo caba ta opera bou di supervision financiero riba nivel di Reino a base di e Landsverordening Aruba Tijdelijk Financieel Toezicht (LAft), cu desde 2015 ta forma e base legal di e supervision financiero actual. Rijkswet HOFA no ta introduci supervision financiero pa prome biaha, sino ta propone un structura nobo cu enfasis riba finansas publico sostenibel y un marco legal mas flexible pa e supervision existente.

Un di e temanan principal discuti durante e encuentro tabata e conseho di Raad van Advies riba articulo 38 cu ta di opinion cu esaki ta contra Staatsregeling di Aruba y tambe e “exit clause” di Rijkswet HOFA. Contrario na e regulacionnan anterior y compara cu e sistema actual, Rijkswet HOFA ta inclui explicitamente un mecanismo di salida den articulo 42, unda e supervision financiero por termina asina cu Aruba a cumpli cu e condicionnan financiero y institucional acorda durante un periodo determina. Pa loke ta trata e conseho di Raad van Advies na e momento aki ta warda riba e conseho di Raad van State riba e HOFA pa por prepara e proximo pasonan. 

Minister Wever a splica cu e punto aki ta importante pa compronde e ley den su totalidad. “Hopi biaha e discusion publico ta concentra riba parti individual di e propuesta. Sin embargo, e ley tambe ta inclui un mecanismo concreto pa termina e supervision unabes Aruba a logra e metanan cu a wordo acorda. Esey ta un elemento importante den e balans entre responsabilidad financiero y autonomia institucional.”

Tambe a comparti cu e marco legal nobo ta mantene como punto di salida cu Aruba mes ta responsabel pa su propio gobernacion y maneho di finansas publico. E meta di e ley ta pa fortalece y proteha finansas publico, creando un fundeshi mas fuerte pa crecemento economico, inversion y stabilidad financiero pa futuro y un reduccion importante di interes.

Durante e sesion, tambe a discuti con e normanan financiero principal den Rijkswet HOFA ta enfoca riba sostenibilidad di debe publico, disciplina fiscal y stabilidad financiero na largo plaso. E normanan financiero aki ta stipula den articulonan 3, 4 y 5 di Rijkswet HOFA, cu ta trata entre otro e normanan pa schuldquote, primair saldo, e trayecto di convergencia y normanan pa maneho financiero. E meta final ta pa fortalece e posicion financiero di Aruba y crea mas espacio pa inversionnan cu ta beneficia nos comunidad directamente.

Minister Wever a indica cu Rijkswet HOFA tin beneficio financiero directo pa Aruba y por contribui na un reduccion di costo di financiamiento pa Aruba. Riba e COVID lening cu Aruba tin cu Hulanda Aruba ta pagando 6.9% interes cu bou di e HOFA lo bira mas o menos 3.5% di interes, dunando Aruba un reduccion di interes di Afl. 128 miyon y riba e prestamonan cu Aruba tin riba mercado internacional, Aruba ta pagando mas o menos 6.5%, cu Hulanda tambe ta dispuesto pa refinancia na mas o menos 3.5%, cu lo duna Aruba un reduccion di interes di mas o menos Afl. 238.5 miyon, pues Aruba lo realisa un reduccion di gasto di interes total di minimo Afl. 366.5 miyon. Ademas, Aruba lo por tin acceso na financiamiento den futuro na un interes considerablemente mas abou cu loke nos por haya den mercado regular. E placa cu nos ta salba na interes por reinverti den prioridadnan real pa nos comunidad, manera infrastructura, scolnan, transporte publico, sector primario y mantene Aruba limpi y atractivo.

Minister Wever ta gradici ATIA y su miembronan pa e dialogo habri, constructivo y productivo.