Tiramento di sushi den dam ta un menasa pa salud publico

Na diferente dam, sushi ta keda tira na rand of hasta den e awa mes, algo cu Santa Rosa ta cualifica como condenabel.

E damnan aki no ta simplemente almacena awa. Na Aruba, hopi cunuceronan ta uza e awa di dam pa muha cosecha y tambe pa duna bestianan bebe. Ora ta tira sushi na of den e damnan aki, por  contamina e awa cu bacteria, sustancianan peligroso of resto di material cu por afecta salud tanto di animal como di hende.

E peligro ta serio. Bestia cu bebe awa contamina por bira malo of transmiti enfermedad. Si ta uza e awa contamina pa agricultura, e contaminacion tambe por drenta den e cadena alimenticio. Esaki por crea riesgo pa salud publico, specialmente ora producto di tera local ta yega na consumo humano.

Ta haci un apelacion na companianan di chica poz pa tene cuenta cu e peligro cu nan por ocasiona. Deposita awa sushi den damnan of laba trucknan di chica poz cu awa di dam por contribui na contaminacion di e awa. Practicanan asina no solamente ta afecta medio ambiente, pero tambe por pone den peligro agricultura, bestianan y salud di comunidad.

E preocupacion ta aun mas relevante awor cu mercado di productonan local ta creciendo na Aruba. Ta  promove y consume mas produccion local, pa e motivo aki ta mas importante aun pa sigura cu e awa cu ta uza pa agricultura ta limpia y sigur.

Autoridadnan ta sigui insisti cu damnan no ta lugar pa deposita desperdicio. Mantene e damnan limpi ta esencial pa proteha produccion local, bienestar di bestia y salud publico di Aruba.

Pa keda semper bon informa:

Like Facebook page Directie Volksgezondheid DVG Aruba

Follow riba Instagram directie_volksgezondheid_aruba

Subi www.dvg.aw

Yama 5224200

Mail na servicio@dvg.aw