Terapia di famia multidimensional
ORANJESTAD - Recientemente a tuma lugar e entrega di certificado di e opleiding ‘Multi dimensionele familie therapie’ (MDFT) den presencia di Minister di Husticia y Asuntonan Social y Procurador-general.
Tur participante, procedente di Respaldo, Wit Gele Kruis, Reclassering, Stichting Hunto y Fundacion Guiami, a completa e opleiding exitosamente.
Durante e entrega di certificado tabata presente docentenan di Stichting Jeugd Interventies desde Hulanda, directornan di e instancianan menciona, como tambe e coordinador di Veiligheidshuis.
Na Aruba no tin semper manera pa trata hobennan criminal y nan famianan. Esey ta un gran preocupacion cu ta para halto riba agenda di Veiligheidshuis.
Mirando e problematica complica di hobennan na Aruba, a bin cu e metodo di terapia multi-dimensional di famia como alternativa pa haci un diferencia pa e famianan aki.
E ta un metodo intensivo cu tin como meta pa reduci criminalidad, bringa criminalidad, evita pa e hechonan ripiti (recidive) y percura pa drecha e relacionnan den sistemanan di famia.
Minister di Husticia y Asuntonan Social y Ministerio Publico a pone e medionan disponibel pa e participantenan por a sigui e opleiding.
E participantenan ta partnernan di Veiligheidshuis y e opleiding a dura mas o menos un aña y mey.
Hopi exito na e terapistanan cu traha cu e metodo aki.