Temporada di Influenza 2025/2026

22-09-2025, 13:31

ORANJESTAD - Departamento di Salud Publico su seccion di Malesanan Infeccioso ta ricibiendo diferente yamada di comunidad pa puntra si e vacuna di Influenza pa periodo 2025/2026 a yega caba.

Departamento di Salud Publico DVG pa medio di e comunicado aki kier informa comunidad y tur grupo di risico cu e vacuna pa cu periodo di 2025/2026 no a yega ainda, pero cu si nos ta en espera di su yegada pronto. Manera cu esaki yega nos lo informa comunidad y tur grupo di risico con lo bay distribui esaki den e diferente barionan di Aruba.

Importancia di e vacuna di Influenza
Influenza no ta djis un simpel griep. Influenza ta ocasiona tur aña segun cifranan di World Health Organisation (WHO) alrededor di 290 mil morto rond mundo debi na complicación respiratorio.

Complicacionnan severo ta mas comun entre:

Muchanan hopi chikito;
adulto cu mas cu un malesa of condicion di salud;
adulto mayor riba 60 aña;
hende muhe na estado.

Periodo di influenza tur aña ta core for di luna di october pa mei pa cual motibo Departamento di Salud Publico ta hiba su campaña di vacunacion contra Influenza tur aña di nobo durante e periodo aki tambe pa yuda proteha e grupo di risico den di nos comunidad.

Mas informacion
Bo kier sa si e vacuna contra Influenza ta bon pabo? Cuminsa acerca bo dokter di cas of specialista cu e pregunta aki.