Temporada di Horcan a Cuminsa Preparacion Por Salba Bida
ORANJESTAD – Awe, 1 di juni, oficialmente ta marca e inicio di temporada di horcan pa region di Caribe y Atlantico y ta dura te cu 30 di november.
Apesar cu Aruba ta situa pafor di e area principal unda mayoria horcannan ta pasa, nos no por asumi cu nos nunca lo haya nos mesconfronta cu e efectonan di un horcan of tormenta tropical.
Historia a mustra cu fenomenonan natural por cambia direccion inesperadamente y afecta nos region.
Directie Volksgezondheid (DVG) ta encurasha comunidad pa tuma e momento aki pa prepara nan mes, nan famia y nan hogar. Calamidad no ta avisa. Preparacion na tempo por salba bida y reduci e impacto di un emergencia.
Tin varios paso facil cu cada famia por tuma awo mes:
- Revisa bo plan familiar di emergencia;
- Percura cu bo tin awa, cuminda y medicamentonan suficiente;
- Warda documentonan importante den un lugar sigur;
- Conoce unda bo por haya informacion oficial durante un emergencia;
- Papia cu bo famia tocante loke cada persona mester haci den caso di calamidad.
DVG den colaboracion cu Crisis Management Office (CMO) a desaroya informacion y guianan practico pa yuda comunidad prepara pa diferente tipo di calamidad, incluyendo horcan, teremoto, tsunami y incendio. Nos ta invita tur ciudadano y residente pa bishita e pagina Calamidad y tuma accion awe.
Preparacion no ta algo cu bo haci ora un menasa ta cerca. E miho momento pa prepara ta prome cu e emergencia yega.
Calamidad no ta avisa, Preparacion por salba bida.
