Tankinan historico di awa na Kibaima lo haya un futuro nobo como Centro di Conocemento y Patrimonio

Ademas a firma un acuerdo di cooperacion pa e proyecto di restauracion. 

Esaki ta un paso importante pa preservacion y herbestemming di e monumento industrial na Kibaima. Despues di restauracion e tankinan lo haya un funcion nobo como Centro di Conocemento y Patrimonio di Archivo Nacional di Aruba (ANA).  

E plan pa duna e reservoirnan un destinacion nobo a cuminsa varios aña pasa. Prome cu 2020 SMFA, hunto cu BOEi (Nationale Maatschappij tot Behoud, Ontwikkeling en Exploitatie van Cultureel Erfgoed) di Hulanda y studiantenan di Hogeschool Rotterdam, a inicia investigacion riba diferente posibilidad pa un funcion nobo pa e monumento. A investiga diferente opcion, pero un destinacion concreto a forma despues cu Archivo Nacional Aruba a acerca Monumentenfonds buscando un localidad nobo. 

E plan di Archivo Nacional Aruba ta pa realisa un centro di conocemento y patrimonio. E centro lo ofrece espacio pa, entre otro, investigacion, educacion, documentacion, conservacion y presentacion di historia y patrimonio di Aruba. Di e forma aki, un localidad cu antes tabata esencial pa suministro di awa na Aruba lo haya un funcion social nobo, enfoca riba conocemento, historia y desaroyo. 

Lo ehecuta proyecto den diferente fase 

Stichting Monumentenfonds Aruba su líder di proyecto, Jennilee Schotborgh, lo guia e proyecto di restauracion. E proyecto ta consisti di diferente fase y ta planea pa termina na 2029.  E prome fase ya a cuminsa. Desde aña pasa ta investigando e diferente rekisitonan cu Archivo Nacional Aruba tin. Pa e di dos fase lo selecta un specialista pa e diseño di e proyecto. E team lo inclui, entre otro, un arkitecto y expertonan riba tereno di construccion y restauracion cu lo ta encarga cu e diseño durante di tres fase. Durante e proceso lo mester tene cuenta cu e partinan historico di e monumento pero tambe cu e aspectonan y exigencianan pa por comberti e interior den un archivo y centro di conocemento.  Por ultimo lo selecta e contratista cu lo ta encarga cu ehecucion di e proyecto.  

Historia di e Tankinan di awa na Kibaima  

E tankinan historico na Kibaima ta conta un parti importante di historia di suministro di awa potabel na Aruba. A construi e prome dos reservoir na 1931 y 1932 door di Landwatervoorzieningsdienst como parti di desaroyo di un sistema moderno di suministro di awa pa nos isla. Na 1941 y 1942, a agrega dos otro reservoir. 

E Tankinan di Awa na Kibaima no tin solamente balor cultural-historico, sino tambe un gran balor arkitectonico y tecnico. Hunto cu e Watertorennan di Oranjestad y San Nicolas y e waterreservoir na Rancho, nan ta testimonio tangibel di desaroyo di distribucion di awa na Aruba. 

Cu e herbestemming aki, e reservoirnan lo bolbe bira un parti activo di comunidad. Unda cu antes e tankinan tabata cumpli cu un funcion esencial pa un di e necesidadnan basico di Aruba, cu ta awa, den futuro nan lo bira un lugar dedica na conocemento, historia, educacion y patrimonio. 

Stichting Monumentenfonds Aruba ta gradici Gobierno di Aruba, Archivo Nacional Aruba, WEB Aruba, Smart Community y FCCA pa e confiansa y cooperacion den e traspaso y asina hunto nos por preserva e pasado pa futuro!