Ta urgi tur persona di nacionalidad Hulandes of residente legal di Aruba actualmente na Libanon, pa bandona e pais mas lihe posibel

E file aki ta den archivo.

ORANJESTAD - Gobierno Hulandes tin algun tempo ta monitor e situacion di conflicto entre Libanon y Israel di cerca y recientemente a publica un conseho di biahe pa ambos pais, di color cora riba www.nederlandwereldwijd.nl. E conflicto entre Hezbollah y Israel ta escalando y Embahada Hulandes no por garantisa yudansa den caso cu un ciudadano di nacionalidad Hulandes haye den problema na dicho pais. 

Gobierno Hulandes ta urgi tur ciudadano di nacionalidad Hulandes pa NO BIAHA pa Libanon ni Israel. Lo yuda activamente pa ciudadanonan cu nacionalidad Hulandes of di otro nacionalidad pero cu tin residencia legal na Hulanda of Caribe Hulandes entro otro Aruba, pa sali for di Libanon cu vuelonan militar of vuelonan comercial mientras esaki ta posibel. Den e proximo dianan, Hulanda lo percura pa transporte aereo militar. Adicionalmente, lo sigui haci esfuerso pa asisti cu salida via aerolineanan comercial. Ministerio di Relacion Exterior di Reino Hulandes ta den contacto cu otro pais cu ta organisa vuelonan pa repatria mas ciudadano Hulandes of residente legal di Reino, lo mas pronto posibel.

Bo mester di asistencia pa sali for di Libanon?

Gobierno Hulandes por asisti cu un salida sigur for di Libanon. Yena e formulario di contacto di Crisis: https://nederlandwereldwijd.custhelp.com/app/registration-nl. Lesa via e siguiente link pa sa e condicionnan pa bin na remarca pa asistencia pa bandona Libanon: https://www.nederlandwereldwijd.nl/crisis/formulier  

Importante pa sa

Actualmente tin vuelonan militar den preparacion pa sali for di Libanon (cu destinacion Eindhoven Airport) riba diabierna 4 di october y diasabra 5 di october 2024. Pa bin na remarca pa asistencia pa bandona Libanon ta sumamente importante pa yena e formulario di Contacto di Crisis. 

Tene cuenta cu dificilmente gobierno Hulandes lo por bolbe ofrece asistencia, si bo persona no por of no ta desea di bandona Libanon na e momentonan aki. E persona cu ricibi e asistencia pa bandona Libanon lo mester regla e resto di e biahe pa e por yega su destino si esaki ta necesario.

Bo ta kedando na Libanon? 

Den caso cu dicidi di permanece na Libanon, ta necesario pa por tin suficiente cuminda, cos di bebe, medicamento y posiblemente combustibel.

Den caso di necesidad of emergencia
Por tuma contacto cu Embahada Hulandes na Beirut 24 ora pa dia, 7 dia pa siman via e centro di contacto di Wereldwijd Nederland via e number di telefon:  +31 247 247 247 of via WhatsApp: +31 6 82 38 77 96.

Pa mas informacion di kico por haci den un situacion di crisis por bishita e siguiente link: https://www.netherlandsworldwide.nl/crisis/what-to-do-crisis