Suma liber di impuesto riba ekipahe di biahero ta bira 900 florin

E exoneracion aki ta valido pa biaheronan cu ta trece articulonan y productonan pa uzo personal na momento cu yega Aruba bek for di exterior.

Generalmente, tur biahero tin derecho riba exoneracion di impuesto riba un cantidad
limita di articulonan y productonan cu ta paga accijns y invoerrechten.
E balor maximo riba e factura cu cada biahero tin derecho riba exoneracion di impuesto entrante 1 di april 2024 ta bira AWG 900,00. Esaki ta aplicabel riba entre otro, articulonan di paña, sapato, holoshi, celular, cos di hunga, y productonan di beyesa etc.

Den caso cu un factura ta consisti di varios articulo y ta suma total mas cu AWG.900,00 Aduana ta cobra impuesto riba e productonan riba e factura cu a surpasa e suma di AWG. 900,00. Si e factura ta consisti di un solo articulo cu ta surpasa e AWG. 900,00, e biahero mester paga impuesto riba e suma completo di e factura y no por desconta e AWG. 900,00 y paga riba e suma restante.

Pa productonan di accijns manera alcohol y sigaria, cada biahero por trece:

• 200 pida (1 slof) di sigaria, of 25 pida di siga, of 50 pida di cigarillos, of 250 gram di tabaco
• 1 liter di bebida fuerte p.e. rum of whisky, of 2,25 liter di biña, of 3 liter di cerbes. Riba e cantidad limita di e productonan aki no mester paga accijns. Den e caso cu e biahero surpasa e cantidad aki, lo mester paga accijns riba e productonan cu surpasa e limite permiti.

Pa bin na remarke pa exoneracion di impuesto, tur biahero:

• Mester tin minimo 16 aña di edad;
• mester tene na cuenta cu e exoneracion ta conta solamente pa articulonan/productonan di uzo personal;
• mester tene na cuenta cu pa cierto articulo/producto entrada ta prohibi of lo tin mester di un permiso, manera drones, remedi, mata y carni.

Aduana ta haci control riba ekipahe y ta urgi biaheronan pa warda tur factura pa por calcula e balor di e productonan cu a cumpra den exterior. Pa mas informacion bishita
www.douane.aw of pagina di Facebook Departamento di Aduana Aruba.