Su Deseo Ta Bira Realidad: William Bergen Barlow Ta Conoce Gobierno di Aruba
ORANJESTAD — E deseo di William Bergen Barlow, un hoben bishitante di Ontario, Canada, a bira realidad ora cu el a cumpli cu su soño di bishita Aruba, danki na Fundacion Make-A-Wish.
Diabierna anochi dia 7 di november durante e ceremonia anual di luz di Pasco na Bestuurskantoor, William tabatin e honor di cende e luznan banda di Prome Minister Mike Eman, Minister Wendrick Cicilia, y otro representantenan di gobierno. E evento a marca e inicio oficial di e temporada di fin di aña.
Tambe a invita William y su famia pa un recorido na Cocolishi, unda nan a topa cu diferente mandatario y a haya sa mas di e trabounan diario di Gobierno di Aruba.
Durante e bishita, Minister Cicilia a presenta William cu un regalo simbolico cu ta representa curashi y perseverancia, cualidadnan cu William a demostra den enfrenta retonan significante di salud. Tambe el a topa cu Minister di Husticia, Arthur Dowers, y a explora varios departamento na Cocolishi.
Impresiona pa e beyesa natural di e isla y e hospitalidad di su hendenan, William a describi Aruba como sumamente bunita. El a expresa admiracion pa tanto e historia di e isla como e calides di e comunidad di Aruba.
Esaki tabata William su prome bishita na Aruba. Meskos cu hopi bishitante pa prome biaha, e tabata captiva pa e awanan cla manera cristal cu tabata rondona e isla y tabata disfruta di pasa tempo na lama, caminda e por a landa y relaha.
Ademas di a participa na e ceremonia di cendemento di luz, William a comparti su gratitud pa e oportunidad di bishita Aruba. “Mi ta stima Aruba,” el a bisa. Apesar di e retonan di salud continuo y hospitalisacionnan frecuente, e ta keda curioso pa conoce diferente cultura y ansioso pa experencia luganan nobo.
Como parti di su bishita, William lo tuma parti tambe na e esfuersonan di reforestacion di Aruba door di planta un mata, un simbolo duradero di su laso cu e isla y e recuerdonan cu el a crea durante su estadia.