Studentenflat den Oranjestad ta bira un realidad
ORANJESTAD - Dia 27 di augustus 2024, Minister di Asunto Economico, Comunicacion y Desaroyo Sostenibel Geoffrey Wever, simbolicamente a traspasa e ex edificio di Ministerio Publico (OM) situa parti patras di ZARA, pa Fundacion Cas Pa Comunidad Arubano (FCCA), cu lo bai converti esaki den vivienda pa studiante.
Parti di e vision di Gobierno ta pa mas hende cuminsa biba y frecuenta den centro di Oranjestad. Pa logra esaki, ta prudente pa rescata edificionnan den centro di ciudad cu ta bandona. Gobierno, como doño di varios edificio den centro di ciudad, a pone e prome paso den e direccion desea, pero e sosten di sector priva ta sumamente importante pa por logra e transformacion di nos caya principal.
FCCA lo bai converti ex edificio di OM den 19 vivienda pa studiante cu lo brinda e posiblidad na tur esnan interesa di establece nan mes den centro di ciudad den un espacio nobo y accesibel. Den e mesun edificio lo destina 3 espacio comercial den cual diferente tipo di actividad comercial ta posibel. E proyecto aki ta un inversion di FCCA di aproximadamente 4.5 miyon Florin.
Oranjestad merece bolbe den su añanan di gloria den cual comercio tabata florece y Gobierno ta haciendo su parti pa ta e catalisado den esaki.