Stichting Monumentenfonds Aruba ta inicia oficialmente fase di sloop di Edificio John G. Eman

E inicio oficial di e prome fase ta encera sloop di e partinan no monumental di e edificio historico, situa na Caya Betico Croes 39-41 den centro di Oranjestad.

E momento oficial a tuma luga den presencia di Prome Minister, Mike Eman, Minister di Finansa, Asuntonan Economico y Sector Primario, Geoffrey Wever, representantenan di Aruba Bank, Centraal Bureau voor de Statistiek (CBS), Sociaal-Economische Raad (SER), arkitecto Bert Kampsteeg, D&C Partners VBA y demas invitadonan.

Proyecto di restauracion

Desde e traspaso di e edificio na december 2025, Monumentenfonds a sigui traha intensivamente riba e preparacionnan necesario pa realisa e restauracion.

• Dia 22 di juli 2026, a selecciona BK Consult, bou di direccion di arkitecto Bert Kamsteeg, pa encarga cu e trabounan di diseño di e proyecto. Hunto cu lider di proyecto Jenilee Schotborgh di Monumentenfonds, e team a traha riba e plannan tecnico y documentacion necesario pa e siguiente fase.
• Dia 2 di october 2026, a tene e destaho pa e prome fase di sloop, unda D&C Partners VBA a wordo selecciona como e contratista. 

Sloop cu respet pa e balor historico

E fase di sloop no ta trata simplemente di kibra of tumba partinan di e edificio. E trabounan ta concentra riba kita cu hopi cuidou e partinan no monumental, cu e meta di conserva y proteha e elementonan historico cu ta duna e edificio su balor monumental.

E proceso aki ta exigi precision, pasenshi y respet pa e historia di e edificio, y lo prepara caminda pa e restauracion di e monumento mes. Ta calcula cu e fase di sloop lo dura mas o menos 2 luna despues di cual lo continua cu preparacion pa a siguiente fase. 

Un futuro nobo pa John G. Eman Building

Despues di e restauracion, John G. Eman Building lo haya un funcion nobo, combinando actividadnan publico, comercial y di oficina:

• Oficina di gobierno y di SER: Centraal Bureau voor de Statistiek (CBS) y Sociaal-Economische Raad (SER) lo establece nan oficinanan den e edificio restaura. 
• Espacio commercial y residencial: Ademas, e proyecto ta inclui un restaurant y apartamento, cu lo contribui na un ambiente mas dinamico y atractivo den centro historico di Oranjestad. 

Esaki ta forma parti di e vision di Stichting Monumentenfonds Aruba: conserva nos patrimonio historico, mientras nos ta duna monumentonan un funcion nobo y sostenibel pa futuro.

Actualmente, Monumentenfonds ta den e fase final di negociacion pa sera e contrato pa explotacion di e restaurant y e apartamento. Mas informacion tocante e explotacion y e entidad cu lo encarga cu esaki lo wordo comparti proximamente.

Cooperacion entre diferente partnernan

Realisacion di un proyecto di e magnitud aki ta posibel danki na e cooperacion y confiansa di diferente partnernan.

Stichting Monumentenfonds Aruba ta expresa su agradecimento na:

• Land Aruba, Minister President Mike Eman, Minister Geoffrey Wever;
• Aruba Bank y Nationaal Restauratiefonds pa nan contribucion y cooperacion durante e proceso; 
• Monumentenbureau pa su cooperacion den e proyectonan di restauracion;
• arkitecto Bert Kamsteeg y su team di BK Consult, como tambe na D&C Partners VBA, cu lo encarga cu e ehecucion di e prome fase di sloop;
• SER y CBS pa nan confiansa y pasenshi durante e proceso;
• Bestuur y team di Stichting Monumentenfonds Aruba pa nan dedicacion y esfuerso.

Hunto nos por sigui preserva nos pasado pa futuro!