Soft launch di e website di gobierno renoba

E website renoba tin un diseño nobo cu un look and feel moderno. Nabegacion riba e website ta mas facil, loke ta optimalisa e experiencia di e usuario.

Aunke no ta probabel, por surgi algun problema chikito durante cu e website renoba ta den aire. 
P’esey no ta pidi su comprension durante e periodo di transicion. Den e prome dianan despues di e lansamento e search engine por sigui  referi (bay na) e website bieu. Nos ta traha estrechamente cu nos partners pa soluciona e problema mas pronto cu ta posibel pa asina e transicion bay sin problema.

Meta di e "Website Land Aruba" ta pa na prome luga duna informacion tocante di producto y servicio di Gobierno di Aruba na e ciudadano di Aruba y na segundo luga tur otro interesado na Aruba of na otro parti di mundo. E website renoba ta keda dividi den tema; e sistema di nabegacion ta a base di tema cu e ciudadano tin experiencia cu ne.

Ademas di informacion (segun temanan), e ciudadano ta interesa di haya informacion concreto tocante producto y servicio riba e website. Ta asina cu e ciudadano kier informacion completo tocante di por ehempel "Paspoort": E kier sa kico e ta, con e ta hay'e, kico e mester trece, con hopi e mester warda y cuanto e producto ta costa. E deseo y pregunta di e usuario ta e punto di salida. Si e informacion no ta disponibel, por haci pregunta of pidi informacion adicional via un formulario di feedback.

E website ta ofrece un resumen cla di e producto y servicionan cu gobierno ta ofrece, p’asina e usuario por haya e informacion cu e ta busca lihe.
Tin cu remarca cu ainda e loket digital no ta completo. Meta ta pa yena e loket mas pronto cu ta posibel cu producto y servicio.

E website ta den tres idioma, Papiamento, Hulandes y Ingles. E parti Ingles ta yena parcialmente  y e meta ta pa yena e website na Ingles cu informacion tambe.

Cu gran dedicacion y entusiasmo trahadonan di Departamento di Informatica y Automatisacion,   Servicio Informativo di Gobierno y SIM Caribbean a traha pa e website renoba bira un realidad.

Ta spera cu nos website renoba lo ta na Bo(so) servicio. Boso reaccion ta aprecia pasobra e ta yuda mehora nos servicio.