Sinterklaas y su Pietnan ta na Aruba!
ORANJESTAD - Riba 16 di november 2025, hunto cu un multitud di mayor y mucha, Prome Minister mr. Mike Eman hunto cu Minister di Vivienda drs. Rene "Baba" Herdé, a duna Sinterklaas y su Pietnan un caluroso bonbini.
E entusiasmo tabata hopi grandi cerca e chikitinnan pa por a wak Sinterklaas yega, aunke algun tabatin tiki miedo pa Piet no hibanan Spaña.
Na su yegada, Sinterklaas a saluda e publico grandi y a comparti un mensahe di gran balor cu esnan presente. Mirando e importancia pa cuida nos naturalesa y den cuadro di e plan nacional di reforestacion den cual kier stimula comunidad pa planta cien mil mata den e siguiente cuater aña, Sinterklaas a trece un mata special for di Spaña pa Prome Minister y a priminti Prome Minister di lo bay planta esaki hunto cu ne prome cu e bolbe Spaña. Asina e homber santo tambe ta duna su contribucion na e vision pa haci Aruba bunita yena di mata.
E parada di Sinterklaas y su Pietnan a sigui den e tram y pasa den Caya G. F. Betico Croes y termina na Plaza La Linda na unda e celebracion a continua.