Serie di tayer gratis “Masterclass Entrepreneurship” a ranca sali na DAECI
ORANJESTAD - Riba 27 di februari 2025 den un sala yen e prome workshop di e tayer gratis organisa pa Departamento di Asuntonan Economico, Industria y Comercio, a traves di su unidad IDEA a ranca sali.
E tayer aki ta organisa specialmente pa tur esnan cu ta desea cuminsa of crece den nan caminda empresarial.
Masterclass Entrepreneurship su programa ta consisti di 4 fase, y cada fase ta consisti di 4 pa 6 workshop.
E fasenan aki ta parti pa enfoca riba:
- Con pa plan bo negoshi ;
- ansa bo negoshi riba mercado;
- con pa maneha bo negoshi;
- crece bo negoshi.
Den e prome workshop di e prome fase a cuminsa cu e parti di market research y competitive analysis. E workshopnan aki ta bou guia di sr. Edward Erasmus di Erasmus Consulting & Training cu ta comparti su conocemento riba investigacion di mercado, analisis di competencia pa asina yuda e participantenan crea un base fuerte pa negoshi
"Mi ta contento di mira cu hopi hende a acudi y a uza e oportunidad aki pa asina eleva nan mes y asina realisa nan soño di un propio negoshi”, Minister demisionario di Asunto Economico, Comunicación y Desaroyo Sostenibel, Geoffrey Wever a comenta. E ta demostra cu e espirito comercial, ambicional y creativo ta uno bibo den nos comunidad. Minister Wever a desea tur participante hopi exito y a gradici IDEA, bou guia di Sra. Louella Croes y Sra. Judella Trim, pa nan empeño pa logra organisa e serie di tayer aki. Keda pendiente y sigui e pagina di IDEA-Aruba pa asina keda altanto di tur tayernan cu lo organisa den 2025.