Scol Soeur Juliette a habri su biblioteca escolar pa tur alumno
ORANJESTAD - Diabierna 3 di october ultimo, Servicio Mediateca Escolar tawata invita na apertura oficial di e biblioteca escolar di Scol Soeur Juliette.
Despues di 2 aña, esaki a keda cla y e yama ‘Bichi Sabi’. Coleganan di Servicio di Mediateca escolar di Biblioteca Nacional a yuda cu sanering y e interior di e biblioteca. Cu ayudo financiero y ayudo di tur e miembronan di Quota International of Aruba a logra cu awe Scol Soeur Juliette tin un hoya di biblioteca pa tur su alumnonan. Minister di Relacionnan den Reino, Enseñansa, Hubentud, Innovacion y Deporte sra. Gerlien Croes tabata tey pa felicita tur presente.
Na 2021 Emmaschool a haya un otro nomber. Pa medio di un decreto di cambio di nomber Emma School a bira ‘Scol Soeur Juliette’. Scol Soeur Julliette ta un scol special. E cambio di nomber tambe a nifica e inicio di un era nobo pa enseñansa special. Awor e alumnonan ta haya nan diploma ora cu nan finalisa enseñansa primario y secundario. A scoge e nomber di Scol Soeur Juliette, pa e balor cu esaki ta trece cu ne. E religioso aki a nace na Bonaire pero Aruba a bira su cas.
Pa varios aña Scol Soeur Juliette a pidi airco nobo. Esaki a haya oido. A aloca 38 airco nobo pa Scol Soeur Juliette na aña escolar 2023-2024. E scol por a sigui desaroya y awor tin su propio biblioteca caminda alumnonan por bay lesa buki of fia buki.