Savaneta Seafood Festival lo tuma luga dia 28 di september 2025 na Savaneta.

E iniciativa, organisa pa Fundacion Savaneta Prome Capital, tin como meta pa duna atencion y recorda e historia rico di pesca di Savaneta, trece e comunidad hunto, crea oportunidadnan pa emprendedornan y posiciona Savaneta como e districto di pesca di Aruba. Pa garantisa un organisacion exitoso di e festival, Gobierno a firma un acuerdo di cooperacion cu e fundacion E festival lo ta un evento anual riba e agenda di Ministerio.

Minister di Finansa, Asunto Economico y Sector Primario Geoffrey Wever a enfatisa cu e iniciativa aki ta cuadra directamente cu e maneho di gobierno cu ta enfoka pa fortalece e sector primario, stimula emprendemento y diversifica e economia di Aruba.

E prome Savaneta Seafood Festival lo conta cu benta di cuminda di lama fresco, torneo di pesca y entretenimento musical. E festival lo brinda un plataforma pa productornan local ofrece nan productonan, innovacion culinario y pa atrae turista, mientras cu ta reforsa identidad. Stimulando loke ta di nos y conexion cultural di Aruba.

Minister Geoffrey Wever ta invita Aruba henter pa bin bishita e Savaneta Seafood Festival dia 28 di September y duna sosten y apoyo na un iniciativa unico cu gran potencial pa bira algo grandi pa nos hendenan y nos bishitantenan.