Safety Week 2026

AAA ta reafirma e compromiso pa fomenta un cultura di siguridad bou di tur usuario y stakeholder di aeropuerto cu ta opera na Aeropuerto Internacional Reina Beatrix.

“Siman di Siguridad” ta fungi como un plataforma importante pa educacion, colaboracion y conscientisacion, treciendo hunto e empleadonan di aeropuerto, partnernan di aerolinea, instancianan di gobierno, dunadonan di servicio, esnan cu ta responde na emergencia y demas miembronan di e comunidad di aeropuerto. E programa ta diseña pa fortalece e cultura di siguridad di e aeropuerto promoviendo intercambio di conocemento, excelencia operacional y un compromiso colectivo pa mantene un ambiente sigur den aeropuerto.

Durante henter e siman, e participantenan a asisti den un serie di presentacion informativo y sesion interactivo duna door di partnernan di aeropuerto y expertonan den e industria. E topiconan cubri a inclui e importancia di cumpli cu proceduranan di siguridad di aeropuerto, miho practicanan di siguridad den airside, preparacion di emergencia y procedura di evacuacion, mantencion di aeropuerto, maneho di trafico aereo, operacion di combustibel di avion y con pa atende cu emergencia den e instalacionnan di combustibel. E participantenan tambe tabatin e oportunidad pa bishita e sitio di trabou di construccion di Fase 1B di Gateway 2030, pa haya un bista riba e medidanan  y practicanan di siguridad implementa dentro di un ambiente di desaroyo activo na aeropuerto.

E siman a finalisa cu AAA su Foreign Object Debris (FOD) Walk di kwartaal 2, treciendo hunto e participantenan di e comunidad di aeropuerto pa haci un inspeccion profundo alrededor di e rampa di aeropuerto. Durante e inspeccion, e participantenan a identifica y piki obhetonan straño y demas peligernan potencial cu lo por afecta e operacion di e avionnan, e ekipo y e personal cu ta traha den area operacional. E iniciativa trimestral aki ta keda un medida proactivo importante pa mantene un ambiente operacional sigur y eficiente.

Andry Lopez, Safety & Compliance Manager na Aeropuerto di Aruba, a enfatisa riba e significado di e iniciativa aki: “Safety Week ta sigui ta un oportunidad importante pa trece henter nos comunidad di aeropuerto hunto rond di un obhetivo comparti; garantisa e standardnan di mas halto di siguridad den tur loke nos ta haci. E participacion y colaboracion demostra durante henter e siman ta confirma cu siguridad no ta responsabilidad di un departamento so, sino mas bien e ta un compromiso colectivo di tur esnan cu ta traha na aeropuerto.”

Door di involucra e usuarionan di aeropuerto den discusionnan significante y iniciativanan practico di siguridad, Safety Week 2026 a reenforsa e importancia di vigilancia, comunicacion y colaboracion pa mantene e siguridad operacional di aeropuerto.

Aruba Airport Authority ta gradici tur presentado, partner y participante cu a contribui na e exito di Safety Week 2026 y ta keda comprometi pa continuamente engrandece conscientisacion di siguridad y excelencia operacional den henter e comunidad di aeropuerto.