Riba Dia di Independencia di Jamaica, a hisa e bandera Jamaiquino pa prome bes na rotonde di Aeropuerto Internacional Reina Beatrix

Esaki sigur tabata un momento di gran orguyo pa e comunidad Jamaiquino, Consul Honorario Sr Donald Taylor, Prome Minister mr. Mike Eman, miembronan di Parlamento y invitadonan cu a yega hunto pa presencia pa prome biaha e bandera di e pais bay halto na e rotonde.

Sr. Chris James, hunto cu e ekipo di CCDN, a organisa e evento special aki den cual diferente orado a hiba palabra. A habri e atardi cu oracion di Pastor Euphema McLean di God’s Faith Pavillion Deliverance Ministries, sigui pa palabra di Consul Honorario di Jamaica Donald Taylor via video. Tambe a hiba palabra Vice-Presidente di Parlamento mr. Muzannin Wever, sigui pa miembro di parlamento Otami Thomasia.

Prome Minister mr. Mike Eman na su turno tambe a dirigi su mes na tur presente.
“E momento cu subi e bandera di Jamaica na e rotonde di aeropuerto, ta momento di reconocemento, respet y di afirmacion cu e comunidad Jamaiquino ta pertenece y ta forma parti di e comunidad di Aruba.

Prome Minister den su discurso a enfatisa riba e importancia di e presencia di e comunidad Jamaiquino riba nos isla, no tin un solo trabou caminda no a mira un Jamaiquino trahando. Nan t’ey den cada trabou, cada lucha, cada sodo cu a forma parti di e lucha pa un miho Aruba.