Reunion gobierno cu Blue Marine Foundation y Aruba Conservation Foundation
ORANJESTAD - Gobierno di Aruba recientemente a tene un reunion cu Blue Marine Foundation y Aruba Conservation Foundation (ACF).
E proposito di e bishita tabata pa explora y fortalece aun mas e colaboracion existente, y identifica con nan por sigui apoya Aruba den planificacion, maneho y financiamento sostenibel di proteccion marino.
Blue Marine Foundation ta un organisacion internacional cu mas cu 15 aña di experiencia den conservacion di oceanonan riba nivel mundial. Durante e ultimo cinco aña, nan a traha estrechamente hunto cu ACF na Aruba, apoyando iniciativa manera restauracion di matanan di Mangel, fortalecemento institucional y apoyo tecnico riba planificacion basa riba ciencia.
Durante e reunion, Prome Minister di Aruba mr. Mike Eman, como tambe Minister di Infrastructura Rene Herdé, a intercambia idea riba progreso, siguiente pasonan y oportunidadnan pa sigui fortalece e proteccion y maneho responsable di nos medio ambiente marino.
Gobierno di Aruba a gradici Blue Marine Foundation y ACF pa nan compromiso continuo y colaboracion den beneficio di Aruba y su recurso natural.
Miembronan di Blue Marine Foundation cu ta di bishita riba Aruba:
- Dr Judith Brown – Projects Director
- Fiona Llewellyn – International Projects Lead
- Kaija Barisa – Senior Blue Economist
- Maddie Millington-Drake – Senior Climate Project Manager
Mensahe clave
Blue Marine ta expresa su aprecio pa liderazgo di Aruba y e esfuerso cu ya ta haci den area di conservacion marino. E organisacion ta mira cu optimismo e colaboracion continuo pa sigura un resultado sostenibel y efectivo pa pueblo di Aruba, su economia y su medio ambiente marino, cu ta di gran balor internacional.