Reunion cu stakeholders relaciona cu proyecto di reforestacion

Durante e encuentro aki a pensa riba e diferente opcionnan mas eficiente pa por logra e plan ambicioso pa planta 100 mil mata durante di e siguiente 4 añanan tur rond di Aruba. Aruba ta conoci pa su clima hopi calor y seco, pa cual mester pensa riba e solucion mas practico y realistico pa por completa e plan di reforestacion exitosamente, no solamente pa e duracion di e proyecto, sino a largo plaso. 

Desaroyo acelera na Aruba durante di e ultimo decadanan, a causa cu nos a perde mas di 70% di nos matanan y hunto cu esaki, gran parti di nos ecosistema. Segun e raport recien haci pa Universidad di Wageningen di nos naturalesa, si no tuma accion urgente pa cambia e direccion aki, pronto lo ta demasiado laat. Ta hustamente esaki a motiva gobierno lansa e proyecto aki pa planta 100 mil mata nativo tur rond di Aruba.

Ta importante, no solamente pa Gobierno of NGO's tuma accion pa recobra nos naturalesa, pero mester por conta cu e contribucion di nos comunidad. Na final di dia, ta nos tur ta depende di un manera of otro, directo of indirectamente, riba nos naturalesa. E interconexion cu tin entre matanan riba tera, lama y bida marino, cu ta nos atraccion principal, ta di sumo importancia.

Combati problemanan di falta di awa

Mirando e reto di secura, e necesidad di awa ta grandi. Un posibilidad pa yega na awa ta reciclahe. Esaki ta tarea principal di e planta di purifcacion AWSS. Na parkietenbos tin un tanki cu ta carga 300 kuub di awa mientras cu ta produci alrededor di 3000 kuub di awa recicla. Lamentablemente e mayoria di e awa aki ta bay lama mirando cu no tin manera pa warda esaki. Den e plan di expansion di AWSS ta inclui varios tanki di awa, tanto pa AWSS na Zeewijk como na Barcadera cu lo construi den e siguiente aña. Cu esaki por warda alrededor di 4000 kuub di awa cu por uza den plantacion. 

Un di e problemanan cu ta surgi na AWSS cu ta haci daño na e calidad di awa cu mester refina, ta e empresanan cu ta tira azeta y kimico den e sistema di riolering cu tin su influencia riba e operacion debido di e planta di purificacion di AWSS na Bubali y Gobierno tin e tarea pa crea maneho pa evita esaki.  

Explora solucionnan tradicional y natural di awa 

Un di e sistemanan mas comun te ainda ta e uzo di dam di awa. Esaki ta esencial no solamente pa esnan cu ta planta sino tambe pa logra e proyecto di reforestacion aki. Ta importante pa inventarisa e damnan cu ta funcional ainda y cu ta contene awa di calidad pa irigacion. Mirando e escasez cu tin awo caba, cu e plantamento di 100 mil mata mas, mester expande e cantidad di damnan pero tambe sondeo maneranan pa evita cu e awa di yobida ta bay perdi. 

Un otro posibel solucion pa contene e cantidad di awa di yobida di bay lama, ta pa hustamente no haci e rooinan limpi, mirando cu e matanan cu a crece den e rooinan aki ta wanta e tera hunto, ta mehora e calidad di e tera, ta duna e awa tempo suficiente pa drenta den tera y muha a areanan rond di e rooinan. Ademas e ta reduci e fluho di awa cu ta bay perdi den lama. 
For di e encuentro aki, a determina cu tin varios pos di molino di biento, cu ta sea seco of e calidad di awa no ta apto pa muha mata. Instancianan di Gobierno lo haci estudio di e suela pa determina unda otro tin posibilidad pa coba posnan nobo y instala molino di biento. 

Un esfuerso comun

E proyecto di reforestacion ta berdad ambicioso, pero gobierno hunto cu stakeholders, ta determina pa logra esaki pa yuda nos agricultornan cu mester suficiente awa pa nan cultivonan.