Restructuracion di Aparato Gubernamental bayendo den bon direccion

Esaki ta un estudio cu ta tuma su tempo, y lo tin resultadonan importante pa Aruba.

Gobernacion ta tumando pasonan pa haci e aparato gubernamental mas eficiente, pa mehora mas ainda e servicio na comunidad. Den e cuadro aki, tin dos proyecto grandi andando, restructuracion di e aparato gubernamental y e proyecto di e-Government.

Segun Prome Minister, pa e trabounan di restructuracion di e aparato gubernamental conforme e acuerdonan pa reforma segun e Landspakket, a palabra cu Hulanda cu nan lo duna asistencia den esaki y Hulanda a compromete PriceWaterHouse Coopers pa haci e estudio con por optimalisa e aparato gubernamental. Trabounan ya a cuminsa y a reuni cu tur
departamento di Gobierno. E prome resultado a keda cla y dia 5 di februari Prome Minister a
haya un presentacion preliminar di DRH.

Den e estudio a tene cuenta cu diferente tarea, entre otro cua ta e tareanan cu segun ley e departamentonan mester haci y cua ta haciendo cu no ta segun ley. Tambe a pone atencion na e tareanan cu lo por privatisa y cua mester stop. Den e estudio a conclui cua ta e tareanan cu mester haci y cua no ta haciendo, y con pa structura esakinan miho posibel.
E departamentonan cu ta resorta bou di Ministerio di Asunto General y Infrastructura a
pasa den e proceso aki y DRH hunto cu Prome Minister, a repasa e conclusionnan di e
estudio. A base di e conclusionnan aki, lo sigui cu e siguiente fase den cual lo bin cu
proposicionnan concreto kico ta e tereanan cu lo por privatisa entre otro, pa asina
restructura e aparato gubernamental y haci’e mas eficiente.

E aparato gubernamental mester ta mas eficiente, cu suficiente empleado cualifica y cu tur herment pa duna e comunidad di Aruba servicio optimal.