Representante special nobo di Hulanda, Annemieke Verrijp, a reuni cu Prome Minister
ORANJESTAD – Relacionnan internacional ta algo cu ta asunto di Reino y den esaki Aruba
tin un parti importante.
Den e caso aki semper Hulanda ta manda un representante special (special envoy) stationa Corsou, pa yuda den e comunicacion entre e islanan y Ministerio di Relacion Exterior di Hulanda.
Recientemente, Prome Minister Evelyn Wever-Croes hunto cu directora di Departamento di
Relacion Exterior di Aruba (DBB), sra. Jocelyne Croes, a cera conoci cu e “special envoy”
nobo di Hulanda, sra. Annemiek Verrijp. Sra. Verrijp recientemente a cuminsa traha
na Corsou y di eynan e ta asisti Aruba pa logra tin miho comunicacion cu Ministerio di Relacion Exterior di Hulanda.
Durante e reunion a elabora riba varios punto importante pero principalmente riba e tema di
Venezuela. Aki tanto DBB, Ministerio di Relacion Exterior di Hulanda y Gobierno di Aruba tin un rol importante. Tur wowo ta riba e eleccion presidencial na Venezuela dia 28 di juli proximo. Despues di esey lo mantene contacto pa wak con pa sigui atende cu e tema di Venezuela. Ta importante pa keda atende cu e area maritimo di nos region y con pa garantisa e siguridad di e area aki. Traficacion di droga den e area maritimo entre Venezuela y Aruba ta alarmante y Aruba tin un rol crucial den combati esaki.
Sra. Verrijp anteriormente tabata embahador na Republica Dominicana y conoce a region di Caribe. Prome Minister tin tur confiansa cu e asistencia di sra. Verrijp lo yuda fortifica e comunicacion cu Ministerio di Relacion Exterior di Hulanda.