Reforestacion ta duna significado nobo na patrimonio historico: Rotonde ta resulta di ta e mas bieu di Aruba
ORANJESTAD - E rotonde, caminda dia 14 di juli pasa, oficialmente a lansa e Programa Nacional di Reforestacion door di gobierno no ta solamente un punto simbolico pa un Aruba mas berde, pero tambe un luga cu tin gran significado historico.
Imagen nobo y portret di archivo ta mustra cu e rotonde ey ta data for di aña trinta di siglo pasa y ta un di e rotondenan di mas bieu cu ainda ta existi riba e isla.
Den portret bieu por mira cla cu tabatin un pilar, manera obelisco den centro di e rotonde, cu un forma T caracteristico riba su cabes, caminda tabata colga luz di strada. E rotonda tabata existi prome cu a construi, e Kerki Protestant Oranjestad. E tabata na bon distancia di algun institucion mas iconico di gobierno colonial di Aruba: e Oficina di Gobernador na Zoutmanstraat 1, e Oficina di Gezaghebber y despues e prome localidad di polis cu tabata banda di e rotonde.
E informacion nobo historico aki ta duna e renobacion y reforestacion un capa cultural y simbolico adicional. “E luga caminda nos a planta speransa pa futuro, ta resulta tambe un sitio di recuerdo y conexion cu nos pasado,” segun Premier Mike Eman. “E redescubrimento di e historia aki ta confirma cu nos identidad ta intimamente liga cu nos espacio publico.”
Nadine da Silva, experto den desaroyo di naturalesa y coordinado di e programa di reforestacion, tambe a reacciona: “Patrimonio berde ta mas cu solamente ecologia. E ta memoria cultural tambe. E palma cu nos ta bay planta pa e programa di reforestacion lo crece no solamente den tera, pero tambe den significado. E rotonde aki ta uni e generacionnan.”
Daphne Every, arkitecto specialista den monumento y historiado di planificacion teritorial, ta enfatisa e balor di e descubrimento: “E rotonde aki a forma un punto di orientacion esencial den e as historico di Oranjestad bieu. Den su cercania directo tabata ubica e autoridad, e gobierno, e iglesia y e vigilancia, cu e tempo ey tabata e centro di Aruba. Reconstrucion y reevaluacion di un luga manera esey ta nifica no solamente agrega gordura, pero tambe recobra identidad.”
E adopcion di e rotonde pa tienda di moda Grupo BENNU (Zara), cu a embeyese cu rand di piedranan natural y klinkers duradero, ta haya un significado mas profundo cu e historia aki. E proyecto ta mustra cu espacio publico por tin balor ecologico y historico na mes momento.
E rotonde, manera crusamento di trafico den centro di gobierno y awor tambe como simbolo di restauracion ecologico, ta forma un compas real entre pasado y futuro.