Reduccion di zonido ta contribui na cuido di e oido
ORANJESTAD – Aruba a drenta su ultimo siman di carnaval y Departamento di Salud Publico (DVG) ta urgi pa sigui nan conseho pa regulacion di zonido pa contribui na cuido di oido.
Ta esencial pa comunidad compronde mas miho henter e aspecto rond di e topico aki.
Kico ta un zonido duro of un ambiente molestioso?
Segun e Organisacion Mundial di Salud (WHO) cualkier zonido cu ta manteni pa 1 minuut of mas na mas cu 65 decibel (dB) den dia y 55 dB anochi ta considera como zonido duro of un ambiente molestioso.
Con zonidonan duro ta afecta tur ser bibo?
Ta describi zonido duro como un ambiente molestioso, caminda e zonido ta afecta ser humano su manera di scucha y percibi. Zonido fuerte tin efecto directo riba audicion y e sistema nervioso. Specificamente riba hende e por afecta e comunicacion, soño y funcionamento adecua.
Cua ta e limite di decibel permiti pa WHO?
WHO ta recomenda pa limita e exposicion na zonido na maximo 53 dB pa minuut den dia y maximo 45 dB pa minuut anochi. Pa loke ta referi zonido den ambiente cu exposicion maximo, no mester expone na mas di 85 dB durante un maximo di 8 ora; mas decibel y mas ora ta conduci na mas riesgo.
Cua ta e indice of nivel di decibel den diferente circunstancia?
Tira un bista riba nos grafico pa compronde mas miho e nivelnan di zonido y e indice di decibel pa cada zonido pa minuut.
Ban cuida nos oido y di otro, ban mantene e nivel di zonido na uno saludabel pa tur. Sea consciente #StimaOido
Pa mas informacion:
- Like DVG riba Facebook page Directie Volksgezondheid DVG Aruba
- Follow DVG riba Instagram directie_volksgezondheid_aruba
- Bishita www.dvg.aw
- Yama DVG na 5224200
- Manda bo email na servicio@dvg.aw