Recordatorio: Ultimo dia pa paga impuesto di vehiculo di motor ta 31 di januari 2024

Pa 2024, Departamento di Impuesto lo no otorga plachi di number nobo, pues tur automobilista lo keda uza e plachinan cora cu blanco di aña 2020 den 2024. 
E tarifa di impuesto di vehiculo di motor di 2024 ta keda igual cu e tarifa di 2023; pues no tin cambio di tarifa. E suma di impuesto cu mester paga, ta riba e comprobante di registracion di e vehiculo di motor, cu el a ricibi di DIMP ora el a registra su vehiculo. 

Costo di e plachinan
Contribuyente  existente no mester paga e costo di e plachinan, debi cu no tin plachi nobo pa 2024. Solamente contribuyente nobo cu a caba di registra un auto y cu mester un number nobo, mester paga e costo di e plachinan cu pa 2024 ta Afl.14,- pa e plachinan grandi y Afl. 10,- pa e plachinan chikito. Pa brommer e plachi ta costa Afl. 10.

Por haci pago di impuesto na oficina principal na Camacuri, MFA Noord, MFA Paradera, MFA Santa Cruz, MFA Savaneta y tambe na e oficina na San Nicolas situa den e edifico di Postkantoor San Nicolas. Pa esnan cu ta haci pago na un di e oficinanan di DIMP, mester tene cuenta cu por paga unicamente cu debit card. Solamente personanan no comerciante di edad 60+ y esnan cu ta ricibi onderstand por paga nan impuesto, solamente na Camacuri, cu placa efectivo. Tene na cuenta cu no ta posibel pa paga e impuesto di 2024, si no a paga e impuesto di e 2023 completamente.
 
Areglo di pago
Esnan cu tin debe di “motorrijtuigbelasting” di añanan te cu 2022 por haya un areglo di pago. E procedura ta igual cu ora ta cera areglo di pago pa otro tipo di impuesto. Pues mester tuma contacto cu e funcionario asigna na e contribuyente, pa asina por start e procedura. Ta importante pa tuma nota cu no ta posibel pa haya areglo di pago pa “motorrijtuigbelasting” di 2023.
 
Pago online via banco
Ta recomendabel pa haci pago online via banco uzando e metodo di "Bill Payment" cu ta un
manera facil den cual ta yena e informacion rekeri. Via Bill Payment transaccionnan di pago online via Aruba Bank, Banco di Caribe of Caribbean Mercantile Bank ta pasa den e sistema di
DIMP den un dia. Pagonan haci via otro banco ta tarda por lo menos 5 dia di trabou pa registra den e administracion di DIMP.
Contribuyentenan cu no ta haci uzo di Bill Payment, mester duna un descripcion detaya pa asina DIMP por registra e pago corectamente.
E contribuyente ta duna e siguiente informacion: persoonsnummer-periodo-number di plachi. Por ehempel: 50001234- 2023-A92345.
Den caso cu tin debe habri di e añanan anterior, lo procesa e pago riba esakinan prome y e
restante riba e impuesto di aña 2023. Si e contribuyente ta bay paga mas cu 1 number via banco, e mester haci un transaccion di pago separa pa cada plachi di number. No ta posibel pa paga un solo suma den un solo transaccion, debi cu esaki lo trece tardansa ora di procesa y aloca e pago. 

Pidi recibo di pago online
Tur contribuyente cu haci pago via banco, por pidi e recibo di Departamento di Impuesto online
via e link: https://www.impuesto.aw/uw-digitale-formulieren-snel-invullen   
Despues ta scoge e opcion: Aanvraag kwitantie motorrijtuigbelasting. DIMP lo manda e recibo pa e contribuyente via e-mail. 

Boet pa incumplimento
Pagonan cu drenta despues di dia 31 di januari 2024 ta laat. Pagonan haci riba 31 di januari 2023 depues di e “cut-off time” di banco lo pasa pa e siguiente dia y ta considera como laat. Pa e “cut- off time” di cada banco por consulta e website di e respectivo banco. Den e caso cu un contribuyente ta laat, e lo tin cu paga tambe e boet pa incumplimento. E suma di e boet ta 50% di e suma cu no a paga.  

Ehempel:   
Impuesto pa aña Afl. 300,00
Impuesto pa mita aña Afl. 150,00
Si acaso no haci pago di e mita aña di Afl. 150,00 promer cu dia 31 di januari 2024, e boet pa incumplimento lo ta Afl. 75,00. Den e caso aki e cliente su debe pa e prome mita di aña 2024 lo ta Afl. 225,00 (150,00+75,00). 

DIMP ta recomenda pa haci e pago di impuesto mas lihe posibel y no warda te na ultimo momento. Pa mas informacion por consulta: https://www.impuesto.aw/motorrijtuigbelasting-betalen