Rapportnan Nobo di Scenario Climatico den Idiomanan Local y un Herment di Scenario Interactivo Lansa pa Aruba, Corsou y Sint Maarten
ORANJESTAD — E International Panel on Deltas and Coastal Areas (IPDC), na nomber di su organisacionnan asociado, a anuncia awe, e publicacion di rapportnan di scenario climatico pa Aruba, Corsou y Sint Maarten den idiomanan local.
E raportnan ta basa riba e publicacion na idioma Ingles publica na december 2025 y awor ta disponibel na Papiamento (Aruba), Papiamentu (Curaçao) y Hulandes. E publicacion ta resultado di un colaboracion unico entre e servicionan meteorologico nacional di Aruba, Corsou, Sint Maarten y Hulanda.
Introduccion di Scenarionan Climatico pa Aruba, Corsou y Sint Maarten
E scenarionan climatico ta forma parti di e proyecto mas recien di IPDC den Caribe Hulandes, enfoca riba scenarionan climatico y servicionan digital di informacion climatologico. Basa riba dato cientifico, a desaroya scenarionan pa e añanan 2050 y 2100. Nan ta destina pa sostene e diseño di e medidanan di adaptacion na cambio climatico y e desaroyo di e plannan nacional di adaptacion climatico.
E scenarionan climatico ta mustra con variabelnan importante di clima por cambia, incluyendo temperatura, velocidad di biento, precipitacion y nivel di lama. Uzando modelonan global di clima y observacionnan historico local, a adapta e scenarionan specificamente na e circunstancianan geografico y climatologico unico di Aruba, Corsou y Sint Maarten.
Den e ultimo decadanan, temperatura promedio mundial a subi como resultado di un aumento den emision di gasnan cu ta causa efecto invernadero. E cambionan aki ta afecta bida di hende rond mundo, incluyendo e habitantenan di islanan chikito manera Aruba, Corsou y Sint Maarten. Pa e motibo ey, ta esencial pa compronde con clima por sigui cambia durante e resto di e siglo aki, pa por tuma decision informa y haci planificacion pa largo plaso.
Introduccion di un tool digital pa uzo facil riba e Climate Impact Atlas
Ademas di e raportnan nobo, IPDC ta anuncia e lansamiento di un tool digital nobo di scenario climatico riba Climate Impact Atlas di Aruba, Corsou y Sint Maarten. E tool interactivo y facil di uza aki ta permiti usuarionan explora e scenarionan climatico y nan implicacion di un forma facil.
Usuarionan por selecta un horizonte di tempo (2050 of 2100) y un variabel di clima (temperatura, precipitacion, biento of nivel di lama) pa mira e proyeccionnan relevante. E resultadonan cu ta presenta den e tool ta completamente consistente cu e raportnan di scenario climatico pa Aruba, Corsou y Sint Maarten.
E tool ta disponibel den tur idioma local, loke ta hacie particularmente valioso pa uzo educativo, informacion publico y participacion di diferente grupo di interes.
Pa Mas Informacion
Por download e raportnan di scenario climatico traduci recientementefor di e siguiente websitenan di partner:
- Aruba: https://www.meteo.aw/ | https://ncrc-aruba.org/
- Curaçao: https://www.meteo.cw/ | https://www.weather.cw/cccp/index.php
- Sint Maarten: https://www.meteosxm.com/
- KNMI: https://www.knmi.nl/
- IPDC: https://ipdc-climate-action.org/projects/climate-scenarios-and-digitisation-for-aruba-curacao-and-st-maarten/
Por haya acceso na e tool digital nobo di scenario via Climate Impact Atlas door di selecta “Climate Scenarios” den e menu:
- Aruba: https://aruba.climateimpactatlas.com/
- Kòrsou: https://www.klimakorsou.com/
- Sint Maarten: https://stmartin.climateimpactatlas.com/
Partnernan
IPDC a desaroya e scenarionan climatico den colaboracion cu su organisacionnan asociado: Koninklijk Nederlands Meteorologisch Instituut (KNMI), Departamento Meteorologico Aruba (DMA), Meteorological Department Curaçao (MDC), Meteorological Department Sint Maarten (MDS), y tambe e gobiernonan di Aruba, Corsou y Sint Maarten.
Stichting Climate Adaptation Services (CAS) a desaroya e tool di scenario climatico.
IPDC ta un iniciativa financia pa Gobierno di Hulanda.
